Sentyabrın 27-28-də Libertadores Kubokunun (LK) pley-offunda sonuncudan əvvəlki mərhələyə start verildi. Cənubi Amerikanın ən nüfuzlu klub turnirində yarımfinalın ilk oyunları keçirildi.

"Football-plus.az" xəbər verir ki, xatırladaq ki, LK-nın ilk pley-off mərhələsi son mövsümün ən yaxşı komandalarının uğursuz çıxışı ilə yadda qalmışdı. Ötən il oktyabrın 29-da keçirilən finalda qarşılaşan “Flamenqo” və “Atletiko Paranaense” mübarizəni 1/8 finalda dayandırmışdı. Yarımfinalda Braziliyanın 3, Argentinanın 1 klubu çıxış edir. Bu o deməkdi ki, ilk oyunlardan birində braziliyalıların dueli qaçılmaz olacaqdı. “Fluminense” – “İnternasyonal” matçı məhsuldar alındı. Ev sahibləri oyuna yaxşı başladılar: artıq 10-cu dəqiqədə Kano Con Kennedinin ötürməsi ilə hesabı açdı. Hissənin sonuna yaxın təşəbbüsü ələ alan qonaqlar fasiləyə qədər cavab qolunu vurdular. Bunda onların işini Samuel Şavyer yüngülləşdirdi: “Fluminense”nin 33 yaşlı müdafiəçisi 5 dəqiqə ərzində iki sarı vərəqə alaraq komandasını meydanda on nəfərlə qoydu. Rəqib say üstünlüyündən 5 dəqiqə sonra yararlandı. İspaniyalı müdafiəçi Uqo Mallo hesabı bərabərləşdirdi. Fasilədən sonra oyun planında üstün görünən qonaq komanda Alan Patrikin zərbəsi ilə önə keçdi. Amma meydan sahibləri əzmkarlıq nümayiş etdirməklə məğlubiyyətdən qaça bidilər. Kano bu dəfə Ninonun ötürməsi ilə qəhrəmana çevrildi. Dubl edən 35 yaşlı argentinalı hücumçu LK-nın bu mövsümündəki qollarının sayını 11-ə çatdıraraq bombardirlərin siyahısındakı liderliyini bir qədər də möhkəmləndirdi.

Argentinadakı matça da maraq böyük idi. Olduqca gərgin keçən “Boka Xuniors” – “Palmeyras” görüşündə hesab açılmadı. Buenos ayreslilər oyun planında aşkar üstünlüyə malik oldular. Onların qapıya endirdiyi 18 zərbədən 7-si dəqiq alındı. Amma bütün hallarda Ueverton qonaqları xilas etməyi bacardı. Braziliya yığmasının 35 yaşlı qapıçısının matçın ən yaxşı oyunçusu seçilməsi meydandakı mübarizənin axarını əyani şəkildə göstərir. Beləliklə, yarımfinalın ilk oyunlarında qalib gələn olmadı.

yarımfinal, ilk oyunlar
Fluminense (Braziliya) - İnternasyonal (Braziliya) 2:2
Kano, 10; 78 – Uqo Mallo, 45+5. Alan Patrik, 64.
Boka Xuniors (Argentina) - Palmeyras (Braziliya) 0:0
Dünən start verilən cavab oyunlarına bu gün yekun vurulacaq.
Bombardirlər: Kano (Fluminense) - 11, Paulinyo (Atletiko Mineyro) - 7, Pabon (Atletiko Nasyonal) – 6, Alan Patrik (İnternasyonal), Artur (Palmeyras), Pons (İndependyente Medelyin) - 5.