Lamin Yamal “Barselona”nın düşərgəsinə qayıdıb. O, zədə səbəbindən İspaniya millisini tərk etməli olub.

Daha əvvəl Kataloniya klubunun mətbuat xidməti 16 yaşlı futbolçunun zədəli olduğunu rəsmən təsdiqləsə də, onun həkimlərin nəzarəti altında əlavə tibbi müayinədən keçmək üçün İspaniya millisinə yollanacağını bildirmişdi. Yamalın müayinədən keçdiyi və milli komandanın Las Rosasdakı bazasında gecələdikdən sonra yenidən Barselonaya getdiyi qeyd olunub. Xatırladaq ki, ispaniyalı hücumçu La Liqanın cari mövsümündə 9 matçda iştirak edib, 1 qol vurub və 1 məhsuldar ötürmə edib.

İngiltərə yığmasında da itki var. “Arsenal”ın hücumçusu Bukayo Saka qarşıdakı matçlarda milli formanı geyə bilməyəcək. Yığmanın baş məşqçisi Qaret Sautqeyt “Arsenal”ın “Mançester Siti” ilə vacib matçını buraxan Sakaya Avstraliya ilə yoldaşlıq görüşü və İtaliya ilə (17 oktyabr) Avropa çempionatının seçmə oyunu üçün dəvət göndərib. Amma milli komandanın tibbi heyəti səhhətinin qənaətbəxş olmamasına görə onun klubuna qayıtmasına icazə verib. Gənc futbolçunun zədəsinin bərpasını “Arsenal”da davam etdirməsi qərara alınıb.