Bu gün Misli premyer-liqasının 9-cu turunun ən vacib görüşü “Neftçi Arena”da keçiriləcək.

Saat 19.30-da start götürəcək qarşılaşmada flaqman “Qarabağ”ı qəbul edəcək. Oyunun əhəmiyyəti haqda çox danışmaq olar. Ancaq hamını maraqlandıran bir sual da var: görəsən, məşqçilər meydana hansı futbolçuları buraxacaq?

“Football-plus.az” təxmini heyətləri nəzərinizə çatdıracaq.

Başlayaq “Neftçi”dən. Bu görüş Adrian Mutu üçün əhəmiyyətlidi. Rumıniyalı mütəxəssis hazırda ölkənin ən güclü komandası olan “Qarabağ”la ilk dəfə qarşılaşacaq. Flaqmanın çalışdırıcısı 1-ci dueldə qələbə qazanmaq arzusunda olacaq. Düşünmək olar ki, Mutu Qurban Qurbanov üçün hansısa sürpriz hazırlayıb. Unutmayaq ki, rumıniyalı 4 yerli futbolçu limitindən istifadə etməlidi. Əslində bu məqama görə, “ağ-qaralar”ın çalışdırıcısı bir qədər rahatdı. Hazırda onun yerli futbolçu baxımından seçim imkanı genişdi. Elə əcnəbi oyunçu seçimində də Mutu sıxıntı yaşamayacaq. Bəs rumıniyalı kimlərə güvənəcək?

Çox güman, qapıda İvan Brkiç dayanacaq. Emil Balayev zədəlidi. Rzaya belə görüşdə güvənmək böyük risk olar. Mutunun müdafiənin solu cinahı üçün üç seçimi var. Burda ən zəif bənd Azər Salahlıdı. Rumıniyalı mütəxəssis yerli futbolçu seçimində axsamamaq üçün Azər Əliyev seçimindən yana olacaq. Lakin Kenni Sayefi də bu mövqedə görsək, təəccüblənməyə dəyməz. Müdafiənin mərkəzində Mark Tamaş və Yuri Matias dueti çıxış edəcək. Sağ cinahda isə Ervin Koffi yer alacaq. Qara Qarayevlə zədəsini tam sağaltmış Eddi İsrafilov dayaq yarımmüdafiəçisi kimi çıxış edəcək. Kilan Lebon sol, Kenni Sayef isə sağ cinah vingeri kimi çıxış edə bilər. Emin Mahmudov pleymeyker mövqeyində yer alacaq. Hücumun mərkəzində isə “Turan Tovuz”la matçda yeganə qolun müəllifi olan Aaron Olanare çıxış edəcək.

Bu, avrokubok qarşılaşması olsaydı, asanlıqla “Qarabağ”ın heyətini diqqətinizə çatdıra bilərdik. Lakin premyer-liqada qaydalar fərqlidi. 4 yerli futbolçudan mütləq istifadə etməlisən. Bu məqam Qurban Qurbanovun işini çətinə salır. Bəhlul Mustafazadənin zədəli, Kevin Medinanın cəzalı olması işləri bir qədər də qəlizləşdirir. Bəs təcrübəli mütəxəssis nə edəcək?

Qapıda Andrey Lunyovun dayanacağı dəqiqdi. Müdafiənin solunda Elvin Cəfərquliyev yer alacaq. Mərkəzdə Bədavi Hüseynov – Rahil Məmmədov ikilisi çıxış edəcək. Müdafiənin sağında isə Mateus Silva yer alacaq. Dayaq yarımmüdafiəçisi funksiyasını Julio Romao yerinə yetirəcək. Marko Yankoviç hücumların qurulmasında komandaya kömək edəcək. Abdulla Zubir sol cinah vingeri kimi bu komandanın dəyişməz simasıdı. Yassin Benzya pleymeykerlik edəcək. Sağ cinah vingeri kimi isə Nəriman Axundzadə oynayacaq. Hücumda son zamanlar formada olan Juninyo yer alacaq.

Xüsusi olaraq diqqətinizə çatdıraq ki, Qurban Qurbanov riskə də gedə, Lunyova istirahət verərək qapıda Amin Ramazanova güvənə bilər. Belədə ilk “11-lik”də Nərimanın əvəzinə Leandro Andrade çıxış edəcək.

Sözsüz, bu, son illərin ən maraqlı qarşılaşmalarından olacaq. Əsas heyətləri təxmin edən zaman ehtimallarla danışırıqsa, oyunda nələrin yaşanacağını təsəvvür etmək mümkünsüzdü.

İLKİN SULTANLI