“Neftçi”də işlər qaydaya düşməyə başlayıb.

“Ağ-qaralar” Konfrans Liqasının 2-ci təsnifat mərhələsinə ciddi şəkildə hazırlaşır. Klub rəhbərliyi yaxın günlərdə transfer çalışmalarına başlayacaq. Belə ki, Adrian Mutuya futbolçuları özünün seçməsi ilə bağlı xüsusi səlahiyyət verilib. Rumın mütəxəssis bunu rəhbərlikdən özü istəyib. Mutu bir müddət azərbaycanlı menecerlərlə əməkdaşlıq etməyəcək. Onsuz da transferlərin hamısı əcnəbilər olacaq. “Neftçi” Avropanın əsas liqalarından oyunçular axtarır. İlkin hədəf 4 müdafiəçi transfer etməkdi. Bunlardan 1-i sağda, 1-i solda, 2-si isə mərkəzdə çıxış edəcək. Yarımmüdafiə xəttinə isə 2 futbolçunun transferi gözlənilir. Mutu 1 pleymeyker, 1 sağ cinah vingeri axtarışındadı. Onun əsas istəyi isə hücum xəttinin güclənməsidi. “Ağ-qaralar” transfer dövründə minimum iki hücumçunu heyətinə qatacaq.

Kenni Sayefin də “ağ-qaralar”ı tərk edəcəyi gündəmdədi. İsrailli futbolçu getmək istəyir. O, oyun tərzinin Bakı klubuna uyğun olmadığını düşünür. Rumıniyalı mütəxəssis yarımmüdafiəçi ilə söhbət etdikdən sonra Kenni haqda yekun qərar veriləcək. Həmçinin Azər Salahlı, Ömər Buludov, İsmayıl Zülfüqarlı, Fərid Yusifli, Yeqor Boqomolski, Rəhman Hacıyev, Höccət Haqverdi kimi oyunçuların da “Neftçi”dən ayrılmaq ehtimalı var. Onlar haqda yekun qərarı da yeni baş məşqçi verəcək. Ola bilər ki, Mutu bu futbolçulardan 4-nü ehtiyat qüvvə kimi saxlasın. Gənclərdən Ağadadaş Salyanski, Rüfət Abbasov, Ömər Qurbanov, Vüsal Əsgərov ya əvəzedici heyətə göndəriləcək, ya da icarəyə veriləcək. Bir sözlə, “Neftçi”ni yaxın bir ay ərzində heyət baxımından ciddi dəyişikliklər gözləyir. Ümid edirik ki, bu yenilənmə flaqman üçün xeyirli olar.

İLKİN SULTANLI