Lionel Messinin artıq bir neçə aydı “İnter Mayami”də oynaması yerli futbolsevərlərin bu oyuna marağını birə-beş artırıb.

“Football-plus.az” xəbər verir ki,ABŞ klubunun həmsahibi Xorxe Mas argentinalı hücumçunun transferindən danışıb.

36 yaşlı dünya çempionunun bu yay PSJ-dən ayrılandan sonra sabiq klubu “Barselona”ya qayıdacağı gözlənilirdi, lakin Messi MLS-də oynamağa üstünlük verdi. Sən demə, Mas həmin vaxt ulduz futbolçuya “Barselona” azarkeşləri ilə vida mərasimi təşkil edəcəyi haqda söz verib: “Messinin “Barselona”dan ayrılması onun istəyi deyildi. Lionel uşaq yaşlarında onu qəbul edən klubu ilə vidalaşa bilmədi. Məncə, vəziyyət Lionelin istədiyi kimi olmadı. Mən ona söz verdim ki, “Barselona” azarkeşləri ilə vidalaşmaq imkanı olsun deyə, qarşıdakı illərdə mümkün olan hər şeyi edəcəyəm. Ola bilər ki, “Barselona” ilə bir matç keçirək”.

Xatırladaq ki, Messinin “İnter Mayami” ilə müqaviləsinin müddəti 2025-ci ilə qədərdi. O, bu mövsüm bütün turnirlərdə meydana çıxdığı 12 matçda 11 qol vurub və 5 məhsuldar ötürmə verib.

Yeri gəlmişkən, “İnter Mayami” heyətini Luka Modriçlə gücləndirə bilər. İspaniya mətbuatının məlumatına görə, ABŞ klubu “Real”ın təcrübəli futbolçusu ilə yaxından maraqlanır. Mümkün transfer üçün təşəbbüsü klubun artıq xorvatiyalı yarımmüdafiəçi ilə görüş keçirən həmsahibi Devid Bekhem göstərib. Deyilənə görə, komandanın aparıcı futbolçusu Messi də Modriç ilə birgə oynamağı çox istəyir. Amma Luka ən azı 2023/24 mövsümünün sonuna qədər “Real”da qalmağı düşünür. Əlavə edək ki, Modriç bu yay Səudiyyə Ərəbistanının adı çəkilməyən klubunun cəlbedici təklifini rədd etmişdi. O, “Real”da 2012-ci ildən oynayır.