Lionel Messinin karyerasını PSJ-də davam etdirmək ehtimalı getdikcə azalır. Ulduz futbolçu klubu ilə müqaviləni yeniləmək üçün maaşını azaltmaq fikrində deyil.

"Football-plus.az" “Goal” saytına istinadən xəbər verir ki, argentinalı hücumçu bununla bağlı mövqeyini rəhbərliyə izah edib. 35 yaşlı oyunçunun hazırkı maaşını saxlamaq və ya artırmaq üçün Paris klubu maaş fondunu, demək olar ki, 30 faiz azaltmalıdı. Belə vəziyyət isə rəhbərlik üçün əlavə problemlər yarada bilər. Messinin klubla müqaviləsinin müddəti bu ilin iyununda başa çatacaq. O, bu mövsüm PSJ-də 32 oyun keçirib, 18 qol vurub və 17 məhsuldar ötürmə verib.

Lionelin sabiq klubu isə PSJ-dəki mövcud vəziyyətdən onu geri qaytarmaq fürsəti kimi yararlanmağa çalışır. Messi “Barselona”ya qayıtsa, Parisdəkindən qat-qat az maaş alacaq. İspaniya mətbuatının məlumatına görə, hücumçunun Kataloniya klubuna keçidi iqtisadi baxımdan mümkündü. “Barselona” 35 yaşlı forvardla danışıqlar apardığını da təsdiqləyib. Messi bu kluba qayıdarsa, ilə təxminən 10 milyon avro qazanacaq.

Xatırladaq ki, dünya çempionu “Barselona”da 2004-21-ci illərdə oynayıb. O, İspaniya klubundan ayrılandan sonra PSJ-yə azad agent kimi keçib.