Qəzetimizin ötən sayında Lionel Messi və Serxio Busketsin təqdimat mərasimi ilə bağlı xəbəri nəzərinizə çatdırmışdıq.

"Football-plus.az" xəbər verir ki, “İnter Mayami”nin həmsahibi Devid Bekhemin dediyinə görə, Messinin təqdimat mərasimini 3,5 milyard adam izləyib: “Şəhərimizə və klubumuza tarixin ən dahi oyunçusu gəlib. Bu məqam bütün dünyanın diqqətini cəlb edib. Messinin təqdimat mərasiminə 3,5 milyard adam baxıb, bu isə çox böyük rəqəmdi”.

Təbii ki, Bekhemin sözlərində şişirtmə var, axı 3,5 milyard planet əhalisinin az qala yarısı deməkdi.

Xatırladaq ki, Messinin “İnter Mayami” ilə müqaviləsinin müddəti 2025-ci il dekabrın 31-nə qədərdi. O artıq iyulun 21-də - Meksika “Kruz Asul”una qarşı oyunda yeni komandasında debüt edə bilər.

Belə görünür ki, “İnter Mayami”ni seçən ulduzların sırası Messi və Buskets ilə məhdudlaşmayacaq. Klubun prezidenti və həmsahibi Xorxe Mas bildirib ki, yaxın vaxtlarda “Barselona”nın daha bir sabiq oyunçusu - müdafiəçi Jordi Alba da komandaya qoşulacaq: “Alba sənədləri imzalayıb və qarşıdakı günlərdə gələcək”.

Bu arada daha bir məşhur futbolçunun “İnter Mayami”nin yolunu tutacağı ilə bağlı xəbər yayılıb. “Qremio”nun hücumçusu Luis Suares bir ildi şərəfini qoruduğu Braziliya komandasını tərk etmək istəyir. ESPN bildirir ki, 36 yaşlı uruqvaylı elə indi “Qremio”dan ayrılmaq niyyətindədi və hətta əməkhaqqının 10 milyon dollarından imtina etməyə də hazırdı. Luis sabiq həmklubları Messi ilə Busketsin formasını geydiyi “İnter Mayami”yə can atır. Uruqvaylının indiki müqaviləsinin müddəti 2024-cü ilə qədərdi. Oyunçunun transfer qiyməti 4 milyon avrodu.