Futzal millimiz Qazaxıstana uduzdu - YENİLƏNİB
Ölkəmizin futzal yığması sabah DÇ-2024-ün elit mərhələsi çərçivəsində Qazaxıstanla qarşılaşıb.
"Football-plus.az" xəbər verir ki, Bakı İdman Sarayında keçirilən matç Vitali Borisovun komandasının ən çətin sınağı olub. Buna səbəb rəqibin A qrupunun favoriti olmasıdı. 2 matçdan sonra 3 xalla turnir cədvəlinin 3-cü sırasında qərarlaşan yığmamız ən azı 2-ci sıraya yüksəlmək üçün mütləq qalib gəlməli idi.
Hər iki tərəfin görüşə ciddi hazırlaşdığını əvvəlki saylarımızda yazmışdıq. Qazaxıstan sentyabrın 29-da təlim-məşq toplanışına başlayıbsa, hətta bunun üçün ölkə çempionatında fasilə yaranıbsa, bizimkilər oktyabrın 2-də bir araya gəlib. Digər tərəfdən, qrupdan çıxacaq komandaların taleyi məhz sabahkı rəqibdən asılıdı. Belə ki, yalnız qazaxıstanlıları məğlub edən heyətin şansı xeyli artacaq. Bəs millimizin bu yöndə hazırlıqları necə gedir? Təlim-məşq toplanışı nə dərəcədə faydalıdı? Rəqiblə layiqincə mübarizə üçün planlar nədən ibarətdi? Baş məşqçi Vitali Borisov suallarımızı belə cavabladı:
“Şükür Allaha, zədəlimiz yoxdu. Məşqlərimiz davam edir. Amma hər şeyin mükəmməl səviyədə olduğunu deyə bilmərəm. Təəssüf ki, bizdən asılı olmadan bəzi çatışmazlıqlar ortaya çıxdı. Öncəliklə heyətdəki dəyişikliklərdən bəhs edim. Amir Şocaeni və Oktay Rüstəmli bu dəfə istirahət edəcək. Onların əvəzinə Murad Quluzadə ilə Rafael Vilelaya şans verəcəyik. Hazırda Vilela, Kardoso və Eduardo məşqlərdə iştirak etmir. Sənədlərlə bağlı problemlərə görə hələ ki Azərbaycana gəlməyiblər. Təlim-məşq toplanışında tam heyətlə hazırlaşsaydıq, daha yaxşı olardı. Çünki Qazaxıstan millisi 8 gün əvvəldən məşqlərə başlayıb. Hətta orda daha yaxşı hazırlıq görülməsi məqsədilə çempionata ara veriblər”.
Mütəxəssis rəqibi ciddi təhlil etdiklərini də bildirdi:
“Qarşı tərəfi 80 fazi tanıyırıq. Çox sürətli futzalçıları var. Rövşən də bu yöndə bizə kömək edib. Qazaxıstanın keçirdiyi son bir neçə matçı izləmişik. Güclü rəqibdi. Müdafiə xətti qısa zamanda hücuma keçib təhükəli vəziyyətlər yarada bilir, nəinki hücumçuları... Biz isə hələ, demək olar ki, bir çox mövqedə kimin oynayacağını müəyyənləşdirməmişik”.
Qeyd edək ki, oyun “CBC Sport”da canlı yayınlanacaq. Matçı zaldan izləmək istəyən azarkeşlər üçün giriş sərbəst olacaq. Maraq üçün xatırladaq ki, millimiz ilk görüşdə Rumıniyaya 1:3 uduzub, ikincidə isə Niderland 6:1 hesabıyla darmadağın edilib.
DÇ-2024, elit mərhələ
A qrupu
Azərbaycan - Qazaxıstan 2:4
Hadi Ahmadi, 11:46, Maneka, 39:55 // Birjan Orozov, 22:25, Duqlas, 26:02, Dauren Tursaqulov, 35:31, Leo, 38:49
Hakimlər: KİRİLL NAİŞOULER, Arttu Kyynaeraeinen, Paavo Komppa (hamısı Finlandiya) Turxan Tursumbayev (Qazaxıstan).
Hakim-inspektor: Tarik Keço (Bosniya və Hersoqovina).
UEFA nümayəndəsi: Sean Dipple (İngiltərə).
6 oktyabr. Bakı İdman Sarayı. Saat 20.00.
1. Qazaxıstan 2 2 0 0 6-3 6
2. Rumıniya 2 1 0 1 6-5 3
3. Azərbaycan 2 1 0 1 7-4 3
4. Niderland 2 0 0 2 1-8 0
KƏNAN BAHADIR
Digər xəbərlər
