“Qarabağ”ı 4-5 min azarkeş dəstəkləyəcək - “Ermənilərin bizə nəsə etməyə gücü çatmaz”
“Qarabağ” bu gün İsveçdə çətin oyuna çıxacaq. “Köhlən atlar” Avropa Liqasının qrup mərhələsinin 2-ci oyununda “Həkken”lə üz-üzə gələcək.
Rəsmi məlumata görə, bizim azarkeşlər üçün 1800 bilet satışa çıxarılıb. İsveç soydaşlarımızın çox yaşadığı ölkələrdən biri deyil. Görəsən, son ölkə çempionunun görüşünə azərbaycanlılar maraq göstərəcək?
Məsələ ilə bağlı daha ətraflı bilgi almaq üçün İsveçdə, həm də Höteborq şəhərində yaşayan, Ağdamda doğulan Kənan Rüstəmovla əlaqə saxladıq. Ondan oyuna marağın olub-olmadığını soruşduq:
“Çərşənbə axşamı komandamız İsveçə gəldi. Biz də onları qarşılamaq üçün hava limanına getdik. Amma komandamızı görə bilmədik. Çünki qapalı çıxışdan istifadə edərək otelə yollanıblar. Bu, bizi həvəsdən salmadı. Təxminən 50-60 nəfər idik. Telefonla əlaqə quraraq kluba otelə gəlmək istədiyimizi bildirdik. Sağ olsunlar, razılaşdılar. Oteldə oyunçularla görüşdük, çay içdik. Yəni “Qarabağ”ın oyununa indidən maraq var. Görüş vaxtı bundan daha artığı olacaq”.
Mediada gəzən söz-söhbətə görə, bu gün görüşdə 300-350 nəfər azərbaycanlı “Qarabağ”a azarkeşlik edəcək. Kənan bəy bu məlumatın doğru olmadığını bildirdi:
“300-400 nədi? Ən azı 1000 nəfərə yaxın adam olacaq stadionda. Bəlkə də çox. Mən maraqlanmışam. Azərbaycanlıların “Qarabağ”ın oyununa həddən artıq marağı var. “Ullevi” stadionu Höteborqun ən böyük arenasıdı. Düşünürəm ki, stadionda “Həkken”in azarkeşindən daha çox “Qarabağ” tərəfdarı olacaq. Mən əminəm”.
“Qarabağ” azarkeşi Azərbaycanın İsveçdəki səfirliyinin nümayəndələrinin də oyunu izləməyə gələcəyini söylədi:
“Zaur Əhmədovun siyasi işləri çoxdu. Düşünmürəm ki, o, futbol məsələlərinə qarışsın. Amma səfirliyin nümayəndələri iştirak edəcəklər. Lakin Zaur bəyin gəlib-gəlməyəcini dəqiq bilmirəm. Bilirsiz, azərbaycanlıların ən çox yaşadığı şəhər Höteborqdu. İnanıram ki, azarkeşlərimiz “Qarabağ”ı dəstəkləmək üçün stadiona axın edəcək. Çünki bu şəhərdə güneyli-quzeyli 30 min azərbaycanlı yaşayır. Mən düşünürəm ki, 4-5 min adam “Qarabağ”a dəstək olacaq. Burda nə qədər “Traktor” sevdalısı gənclər var. Hətta Türkiyədən olanlar da bu gün “Qarabağ”ı dəstəkləmək üçün stadiona gələcəklər”.
Son günlər ölkəmizdə xoş hadisələr yaşanır. Qarabağ seperatçılardan tam təmizləndi. Geydirmə qurumun separatçıları başçıları Dövlət Təhlükəsizliyi Xidməti tərəfindən bir-bir həbs olunur. Bir neçə gün öncə İsveçdə Azərbaycan səfirliyinin önündə ermənilər antiterrorla bağlı aksiya keçirmişdilər. Görəsən, düşmənlərimiz “Həkken” – “Qarabağ” matçında təxribat törətməzlər ki? Sualımızı Kənan bəy belə cavabladı:
“Əvvəlcə Azərbaycan xalqını təbrik edirəm. Belə gözəl anların şahidi oluruq. Mən özüm də 1-ci Qarabağ müharibəsinin qazisiyəm. Həyatımdan indiki kimi gözəl hadisələr yaşanmayıb. Ola da bilməz. Ağdam, Şuşa, Xankəndi geri qayıdır. 30 ildi həsrətini çəkdiyimiz torpaqlara artıq rahat gedə biləcəyik. DTX seperatçı şərəfsizləri həbs edərək Bakıya başlarını əyə-əyə gətirir. Böyük tarixi günlər yaşayırıq. Bu anları bizə bəxş edən əsgərlərimizin, şəhidlərimizin, Ali Baş Komandanımızın qarşısında baş əyirəm. Gələk ermənilərə. Bəli, bizdə məlumat var ki, düşmənlərimiz oyunda təxribat törətmək istəyir. Bizim Höteborqda dərnəyimiz var. İsveç Azərbaycanlıları Təşkilatı adlanır. Bu təxribatla bağlı İsveç polisinə məlumat vermişik. Təbii ki, onlar həmişəki kimi gücləndirilmiş rejimdə işləyəcək. İsveç polisi ermənilərin hansısa təxribatını qarşısını almağa qadirdi. Hələ ki heç bir problem yoxdu. Onların bizə nəsə etməyə gücləri çatmaz”.
İLKİN SULTANLI
Digər xəbərlər
