Məlum olduğu kimi, uzun fasilədən sonra basketbol üzrə avrokuboklarda biz də varıq. Özü də ötən ilin sentyabrında yaradılan “Sabah” avrokuboklardakı debüt mövsümündə yetərincə inamlı təsir bağışlayır.

51 yaşlı Boban Mitevin rəhbərlik etdiyi komanda qruo mərhələsində qarşılaşdığı ilk iki rəqibi məğlub etməyi bacarıb. Bu gün isə daha ağır sınaqla qarşı-qarşıyayıq.

"Football-plus.az" olaraq “Rapid”lə oyun ərəfəsində "bayquşlar"ın bu yay heyətinə qatdığı, zəngin karyeraya malik amerikalı Korin Henri ilə söhbətləşdik.

- Qrup mərhələsinə iki qələbə ilə başladız. Təəssüratın necədi?
- Hələ ki komanda yoldaşlarımızla bir-birimizi anlamağa çalışırıq. Bu marafondu, yarış deyil. Sadəcə, hər gün daha da yaxşılaşmalıyıq. Qalib gəlmək istəyən yaxşı kollektivimiz var. Bu, "Donar"ı məğlub etdiyimiz oyunda özünü göstərdi.

- Komanda olaraq belə başlanğıc gözləyirdiz?
- Avrokuboklardan əvvəl iki ay çox çalışdıq. Biz bura uduzmaq üçün gəlməmişik. Bəli, belə başlanğıc gözləyirdik.

- Birinci və ikinci oyunda komanda son çeyrəklərdə özünə gələ bildi. Bunun səbəbi nədi?
- Bu, hər iki rəqibin nə qədər yaxşı komanda olduğunu göstərir. Heç vaxt təslim olmadılar və qələbə üçün bizim kimi mübarizə apardılar. Basketbol çətin oyundu. Hər komanda oyunun sonunda çətinlikli də olsa, qalib gəlməyə çalışdı.

- Komandaya bu yay "İran"ın "Parsa" klubundan gəldin. Ölkəmizə alışa bilirsən?
- Mən dünyanın bir çox yerlərində olduğum üçün uyğunlaşmaq yönündə çətinlik yoxdu. Bu oyunun içindəyəm və nəyi necə edəcəyimi bilirəm.

- Öz çıxışından razısan?
- Heç vaxt öz oyunumdan məmnun deyiləm. Çünki çıxışımı yaxşılaşdırmaq üçün öz üzərimdə çalışıram.

- Komandada hazırda ən zəif nöqtə haradı?
- Komandamızda zəif nöqtənin olduğunu deməzdim. Çox fərqli şeylər edəcək oyunçularımız var. Birlikdə yaxşı oynamaq üçün daha ideal yollar tapmalıyıq. Belədə matçlarımız çox asanlaşacaq.

- Bu gün "Rapid"lə oynayacaqsız. Hər iki komanda ilk iki oyunda qalib gəlib. Bu görüşdəki şanslarınız nə qədərdi?
- Düşünürəm ki, yaxşı şansımız var. Biz bir oyun planı hazırlayacağıq. Meydana qələbə üçün çıxacağıq. Səhvləri minimuma endirməli və əvvəlki iki qələbənin bizə nə verdiyi üzərində işləməliyik.

- Avrokuboklardakı hədəfləriniz nədi?
- Hər kəsin məqsədi həmişə qalib gəlməkdi. Bacardığımız qədər yaxşı çıxış etmək istəyirik. Hədəfimiz Azərbaycanı və "Sabah"ı Avropada layiqincə təmsil etməkdi.

- Bir çox ölkələrdə çıxış etmisən. Azərbaycan basketbolunu bu ölkələrlə müqayisə edərdin.
- Hələ ki yeniyəm və ölkə çempionatı başlamayıb. Buna görə bu barədə nəsə indidən nəsə demək olmur.

- Azərbaycanda ən çox sevdiyin yemək hansıdı?
- Kabablarınız çox dadlı olur. Ümumiyyətlə, qızardırılmış yeməkləri xoşlayıram.

CAVİD ƏLİYEV