Tur unikal hadisə - cümə günü iki oyunun keçirilməsi ilə start götürdü.

Sonuncu dəfə buna 2011-ci il aprelin 29-da rast gəlinmişdi. Hər iki görüş meydan sahibləri üçün uğursuz alındı. Son 14 rəsmi oyunda uduzmamaqla 2010-dan bəri ən yaxşı göstəricisinə imza atan “Bayer-04”ün bu seriyasına “Köln” son qoydu. “Keçilər” XXI əsrdə ilk dəfə səfərdə ardıcıl 3 qələbə qazandılar! “Şalke-04” isə bundesliqada XXI əsrdə ən gec – 102-ci dəqiqədə vurulan qolla səfərdə “Maynst-05”i məğlub etdi. Helzenkirhen təmsilçisi bu qələbə sayəsində 8-ci turdan bəri ilk dəfə düşmə zonasını tərk etdi.

Şənbə gününün oyunlarına gəlincə, “Leyptsiq” yenə Frayburqdan qələbə ilə döndü. Həftəiçi kubokun yarımfinalında bu rəqibini 5:1 hesabıyla darmadağın edən öküzlər bu dəfə 1 qolla kifayətləndilər. Marko Rozenin komandası bu qələbə sayəsində birdən-birə 3-cü pilləyə yüksəldi. Bu, “Union”un səfərdə “Auqsburq”a uduzması sayəsində mümkün oldu. Zinshaymda növbəti məğlubiyyətə düçar olan “Ayntraxt”ın qələbəsiz seriyası 10 oyuna çatdı! Aşağı pillələri yaxından maraqlandıran matçda “Herta” “Ştutqart”ı evə əliboş yola saldısa, Münhenqladbax “Borussiya”sı “Bohum”dan üstün oldu.

Günün son oyununda “Bavariya” çətinliklə də olsa, “Verder” sınağından üzüağ çıxdı. Ötən həftə olduğu kimi, Qnabri yenə çətin keçən matçda hesabı açaraq qələbənin əsasını qoydu. “Bavariya” bu mövsüm onun qol vurduğu 9 oyunun hamısında qalib gəlib. Münhen nəhənginin “musiqiçilər”ə qarşı bütün turnirlərdə məğlubiyyətsiz seriyası qorxunc həddə - 31 oyuna çatdı. “Rekordmayster” Tuxelin dönəmində ilk dəfə ardıcıl 2 qələbəyə sevinərək 31-ci turu da zirvədə bitirməyi bacardı. Maraq üçün bildirək ki, “Bavariya” 31-ci tura lider daxil olduğu son 29 mövsümün 28-də çempion olub! İstisna yalnız 1992/93 mövsümünə təsadüf edib.

Turun son oyunu bazar günü Dortumdda keçirildi. Çempionluq intriqasının davam etməsi üçün “Borussiya” mütləq “Volfsburq”u yenməli idi. “Canavarlar” heç də asan rəqib olmasa da, “arılar” bu işin öhdəsindən artıqlamasıyla gəldilər. Terziçin komandası əla performans sərgiləyərək ilk 37 dəqiqədə 4 top vurdu. “Volfsburq”un Dortmundda qələbə həsrəti 10 oyuna çatdı. Bundan başqa, “Volfsburq” 6 cavabsız qolla uduzmaqla bundesliqadakı antirekordunu təkrarladı. Komanda daha öncə iki dəfə bu hesabla “Bavariya”ya uduzmuşdu.

31-ci tur
Verder – Bavariya 1:2
Şmidt, 86 – Qnabri, 62. Sane, 72. (42100)
Bavariya: Zommer, Mazraui, Pavar, De Liqt, Kanselo, Kimmix, Qravenberx (Müller, 64), Qnabri, Musiala, Koman (Sane, 64), Mane (Sarr, 88).

Borussiya D – Volfsburq 6:0
Adeyemi, 14; 59. Alle, 29. Malen, 37. Bellingem, 54; 86. (81365)
Borussiya: Kobel, Volf, Zyule, Hummels (Salih Özcan, 63), Ryuyerson (Passlak, 76), Bellingem, Əmrə Can, Brandt, Malen (Roys, 63), Alle (Mukoko, 62), Adeyemi (Reyna, 69).

Frayburq – Leyptsiq 0:1
Kampl, 73. (32900)
Frayburq: Flekken, Kübler (Şmid, 83), Ginter, Qulde, Günter (Ezekvem, 83), Vayshaupt (Röl, 59), Eqqeştayn (Çon Vu Yon, 84), Höfler, Qrifo, Qreqoritş (Petersen, 83), Höler.
Leyptsiq: Blasvix, Klostermann, Simakan, Orban, Henrixs, Soboslai, Laymer (Şlager, 90), Aydara (Kampl, 53), Olmo (Halstenberq, 78), Nkunku (Forsberq, 90+1), Verner (Poulsen, 78).

Auqsburq – Union 1:0
Belyo, 53. (30660)
Union: Rönnov, Yuranoviç, Yekkel (Mixel, 78), Duxi, Knoxe, Russiyon (Trimmel, 78), Xedira, Layduni (Şafer, 69), Haberer (Levelinq, 69), Bekker, Berens (Sibaço, 69).

Bayer-04 – Köln 1:2
Adli, 28 – Zelke, 14; 36. (30210)
Bayer-04: Qradetski, Tapsoba, Ta (Azmun, 81), İnkapye, Frimponq, Andrix, Əmiri (Hlojek, 57), Bakker (Palasios, 57), Diabi, Adli (Bellarabi, 89), Virts.

Hoffenhaym – Ayntraxt F 3:1
Baumqartner, 8. Kramariç, 41-p. Bebu, 45+3 – Götse, 54. (30150)
Ayntraxt: Trapp, Buta (Knauff, 83), Hasebe, Ndika, Ture (Borre, 55), Lents (Alidu, 73), Kamada, Sou (Ebimbe, 73), Götse, Lindström (Aaronson, 46), Kolo Muani.

Borussiya M – Bohum 2:0
Hofmann, 35. Ştindl, 90+1. (53797)

Maynts-05 – Şalke-04 2:3
Barreyro, 53. Martin, 70 – Bülter, 26; 90+12-p. Krauss, 60. (33305)

Herta – Ştutqart 2:1
Kempf, 29. Niderlexner, 45+2 – Girassi, 38. (63443)

1. Bavariya 31 19 8 4 83-34 65
2. Borussiya D 31 20 4 7 73-40 64
3. Leyptsiq 31 17 6 8 55-37 57
4. Union 31 16 8 7 44-32 56
5. Frayburq 31 16 8 7 46-38 56
6. Bayer-04 31 14 6 11 54-43 48
7. Volfsburq 31 12 10 9 54-43 46
8. Maynts-05 31 12 9 10 51-46 45
9. Ayntraxt F 31 11 10 10 51-49 43
10. Borussiya M 31 10 9 12 46-48 39
11. Köln 31 9 11 11 42-49 38
12. Verder 31 10 5 16 49-60 35
13. Auqsburq 31 9 7 15 40-55 34
14. Hoffenhaym 31 9 5 17 42-52 32
15. Şalke-04 31 7 9 15 31-59 30
16. Ştutqart 31 6 10 15 39-54 28
17. Bohum 31 8 4 19 33-69 28
18. Herta 31 6 7 18 37-62 25

Bombardirlər: Füllkruq (Verder) – 16, Qrifo (Frayburq), Türam (Borussiya M), Kolo Muani (Ayntraxt F), Nkunku (Leyptsiq) – 13, Dukş (Verder) – 12.
Növbəti turun oyunları mayın 12-14-ü aralığında keçiriləcək: Köln – Herta, Bavariya – Şalke-04, Union – Frayburq, Ayntraxt F – Maynts-05, Volfsburq – Hoffenhaym, Bohum – Auqsburq, Borussiya D – Borussiya M, Ştutqart – Bayer-04, Leyptsiq – Verder.

Turun rəqəmi
48 – “Borussiya” bu mövsüm evdə ən yaxşı performans sərgiləyən komandadı. “Arılar” doğma meydanda ardıcıl 10-cu qələbəni bayram etdilər! Komanda evdə hamıdan çox – 40 xal toplayıb (13 qələbə, 1 heç-heçə, 1 məğlubiyyət). Ən əsası “Borussiya” “Siqnal İduna Park”da 15 bundesliqa matçında 48 qol vurub. Komanda turnirin tarixində yalnız bir dəfə ilk 15 ev oyununda bundan daha çox qol vurub. Bu hadisə bundesliqanın ən birinci mövsümündə - 1963/64-də baş verib (54 qol). Onu da bildirək ki, dortmundlular şəxsi rekordu yeniləməkdə davam edirlər. Komanda çempionatda ardıcıl 49-cu ev oyununda qol vurdu.

Turun ulduzu
Kərim Adeyemi (Borussiya D) – “Volfsburq”un başına oyun açan “Borussiya”nın heyətində həm dubl edən Bellingem, həm dublla yanaşı, aktivinə məhsuldar ötürmə yazan Adeyemi, həm də 3 məhsuldar ötürmə verən Brandt turun ulduzu seçilməyə layiqdi. Amma biz Adeyemiyə üstünlük veririk. Gənc ulduz bu təqvim ilində sanki “qanad açıb uçur”. Onun hesabında artıq 6 qol, 5 məhsuldar ötürmə var və bunların hamısı 2023-ə təsadüf edib. Özü də komanda yoldaşları onun het-trik etməsinə də şərait yaratdılar. Amma 21 yaşlı futbolçu penaltidən yararlana bilmədi.

Turun sitatı
Tomas Tuxel, “Bavariya”nın baş məşqçisi: “Müllerin hər dəfə ehtiyatda qalmasının bu qədər söz-söhbətə səbəb olması mənə qəribə gəlir. Hər mətbuat konfransında mənə bu mövzuda 100 sual verilir. Tomas əla peşəkardı və bizim üçün vacib futbolçudu. Ötən tur bel ağrıları olduğuna görə ehtiyatda qaldı. Bu dəfə isə qalib heyəti dəyişmək istəmədim. Qnabri və Musiala yaxşı formadadı. Məşqçi bəzən komandanın xeyri üçün sərt qərarlar verməlidi. Əks təqdirdə hədəfə çata bilmərik. Mülleri karyerasına son qoymağa təhrik edirəm? Bu yalandı. Ona böyük hörmətim var. Ehtiyatda qalmaq dünyanın sonu deyil. Başqa güclü oyunçular da ehtiyatda qalır”.