"Sabah"ın basketbol komandası 18 illik avrokubok həsrətinə son qoydu. Özü də Niderland təmsilçisi "Donar"a 75:72 hesabı ilə qalib gələrək.

Qələbəninin memarlarından biri, təcrübəli basketbolçu Endar Poladxanlı "Football-plus.az"ın suallarını cavablandırdı…

- Oyuna yaxşı başladız, lakin sonradan rəqib üstünlüyü ələ keçirdi. Amma sona qədər mübarizə apararaq qələbə qazandız. Bu barədə nə deyə bilərsiz?
- Çətin oyun oldu. Bir həftə yalnız bu rəqibə qarşı hazırlaşırdıq. Onların keçmiş görüşlərinə baxırdıq, təhlil edirdik. Asan olacağını gözləmirdik. Ona görə də tam gücümüzlə meydana çıxmışdıq.

- Oyundan əvvəl demişdiz ki, qrupdan çıxa bilməsək də, ölkəmizin adı üçün oynayacağıq. Artıq bu qələbə sizin planlarınızda dəyişikliyə səbəb olacaq?
- Demək istəyirdim ki, qrupdan çıxmaq üçün oynayacağıq. Lakin alınmasa, ən azından ölkə basketbolumuzu layiqincə təmsil eləməyə çalışacağıq. Bu qələbə planlarımızda dəyişiklik etmədi. Qrupdan çıxmaq üçün mübarizə aparacağıq. Belə davam etməliyik. Mənə görə ilk oyunlar həmişə çətin olur. Bu gün də "Rabotniçki"yə qarşı rahat və gözəl oyun nümayiş etdirməyə çalışacağıq.

- İlk oyun geridə qaldı. Sizcə, komandanın hansısa zonasında problemlər var?
- Bəzi anlarda müdafiədə danışmamağımız bizə çətinlik yaradırdı. Hücumda da tələsdiyimiz zaman top itkiləri ilə üzləşirik. Bu iki məqamı düzəldə bilsək, daha yaxşı olacaq.

- Sizə görə qrupda çətin rəqib hansıdı?
- Hazırda digər iki rəqibi təhlil edirik. Məşqçilərimiz bizim üçün fərqli bir material hazırlayıb. Məncə, ən çətin rəqib "Rapid"di.

- Bu gün "Rabotniçki"lə qarşılaşacaqsız. Qələbə şanslarınız nə qədərdi?
- Hər oyunda olduğu kimi qələbə qazanmaq ehtimalımız 50 faizdi. Avrokuboklarda asan rəqib yoxdu. Daha az səhv edən kollektiv qələbə qazanacaq. İnşallah, bunu biz edərik.

CAVİD ƏLİYEV