Karyerası rekordlarla zəngin olan Kriştiano Ronaldo daha bir zirvəni fəth edib. Ulduz futbolçu unikal göstəriciyə imza atıb.

“Əl-Nəssr”in və Portuqaliya yığmasının hücumçusu futbol tarixinə mindən çox məğlubiyyətsiz oyun keçirən ilk futbolçu kimi düşüb.

Bu məlumatı Beynəlxalq Futbol Tarixi və Statistikası Federasiyası yayıb. Asiya Çempionlar Liqasında “Persepolis”ə qarşı matç (2:0) 38 yaşlı forvardın karyerasında 1000-ci məğlubiyyətsiz oyun olub. Kriştianonun komandası bu oyundan sonra Səudiyyə Ərəbistanı çempionatında “Əl-Əhli”ni məğlub edib (4:3).

Ronaldonun hesabında ümumilikdə 777 qələbə, 224 heç-heçə və 182 məğlubiyyət var. O, 1001 məğlubiyyətsiz oyunun 21-ni “Sportinq”də, 284-nü “Mançester Yunayted”də, 386-nı “Real”da, 114-nü “Yuventus”da, 27-ni “Əl-Nəssr”də, 168-ni isə Portuqaliya millisində oynayarkən keçirib.