Mövsüm başlamaq üzrə olsa da, “Bavariya” hələ də “axsayan” mövqeləri gücləndirə bilməyib.

"Football-plus.az" xəbər verir ki, əslində hələ ötən mövsümdən yüksək səviyyəli mərkəz hücumçusuna ehtiyac duyan Münhen nəhəngində Sadio Manenin ayrılmasından sonra bu problem daha da aktuallaşıb. Harri Keynlə bağlı uzun müddətdi danışıqlar davam etsə də, “rekordmayster” hələ ki İngiltərə yığmasının kapitanını “Tottenhem”dən heç cür “oğurlaya” bilmir. London klubu son dönəmlərdə Keynə görə “Bavariya”nın bir neçə rəsmi təklifini geri çevirib. Amma danışıqlar davam edir. Təcrübəli forvard isə hər şeyin mümkün qədər tez, yeni mövsümün startına qədər bəlli olmasını istəyir. Premyer-liqada yeni mövsüm artıq sabah start götürür. Keyn “Bavariya”ya bu keçidi həll etmək üçün həftəsonuna qədər vaxt verib. Bir çox mənbələrin iddiasına görə Münhen klubu qarşıdakı 24 saat ərzində Keynin transferinə yenidən cəhd edəcək. Budəfəki təklifin 120 milyon avro olacağı gözlənilir. Bu məbləğin 10 milyon avrosu bonuslar şəklindədi.

“Bavariya”nın daha bir problemli mövqeyi qapı xəttidi. Dekabrda ayağı qırılan Manuel Noyer artıq məşqlərə başlayıb. Amma məşhur qapıçının ağrıları yenə də davam edir. Sağ ayağı qırılan Noyer məşqlərdə topa sol ayaqla zərbə endirməyə çalışır. Amma hətta sol ayaqla vurduğu zərbələr zamanı da ağrılar hiss edir. “Bild” nəşrinin yazdığına inansaq, təcrübəli əlcək sahibinin yaşıl meydanlara qayıdışı üçün daha 8-10 həftə gözləmək lazım gələcək. Hətta Noyerin bu ilin sonuna qədər oynanaması ehtimalı da var. Yanvarda transfer edilən Yans Zommer artıq “İnter”in oyunçusudu. Ona görə də “Bavariya” hazırda yenə Sven Ulrayxın ümidinə qalıb. Artıq şənbə günü komandanı ölkə superkuboku uğrunda “Leyptsiq”lə oyun gözləyir. Bu görüşdə qapını Ulrayx qoruyacaq. Elə gələn həftə start götürəcək bundesliqanın ilk turunda “Verder”lə oyunda da, çox güman, qapı yenə Ulrayxa tapşırılacaq. Yeni qapıçı transferinə gəlincə, rəhbərlik baş məşqçi Tomas Tuxelin istəyi ilə diqqətini “Çelsi”li Kepa Arrisabalaqaya yönəldib. Son günlər “Bavariya” “Brentford”lu David Raya ilə maraqlansa da, ispaniyalının boyunun başqa qapıçılarla müqayisədə kiçik (183 sm) olması üzündən Tuxel bu transferi dəstəkləməmişdi. Arrisabalaqanı isə Tuxel “Çelsi”dən gözəl tanıyır və onun keyfiyyətlərinə bələddi. İspaniyalı həm də top-səviyyəli qapıçı statusuna uyğundu. “Sport1”in məlumatına görə artıq “Bavariya” ilə “Çelsi” arasında ilkin danışıqlar baş tutub. Münhen nəhəngi bu transferi mümkün qədər tez həll etməyə çalışır. Xatırladaq ki, 2018-dən “Çelsi”də çıxış edən 29 yaşlı Arrisabalaqa ötən mövsüm premyer-liqada 29 oyuna çıxaraq 33 qol buraxıb.