Bu mövsüm "Qəbələ"nin məşqçilər korpusunda yer alanlar tez-tez hakimlərin qəzəbinə tuş gəlir.

5-ci turda Elmar Baxşıyev qırmızı vərəqə aldı, 6-cı turda Xəqani Məmmədov, "Qarabağ"la matçda isə Rasim Ramaldanov eyni şəkildə cəzalandırıldı. Xülasə 3 turdu "qırmızı-qaralar"ın mütəxəssiləri ancaq qırmızı görməklə hakimlərin qara siyahısındadı. Ağdamlılarla oyundan sonra "Qəbələ"nin köməkçi məşqçisi Xəqani Məmmədovla qısa söhbətimiz alındı.

- Oyunla bağlı fikirləriniz maraqlıdı...
- Rəqib haqda artıq danışmağa ehtiyac yoxdu. "Qarabağ"ın gücü hamıya bəllidi. Buna rəğmən, oyuna yaxşı hazırlaşmışdıq. Matçın əvvəlində konsentrasiyanı itirdik. Bunun da nəticəsində iki qol yedik. Amma hesabda geri düşəndən sonra komanda toparlandı, rəqibi sıxışdırmağa başladıq. Ən azı heç-heçəyə nail olmaq istəyirdik, alınmadı. "Qəbələ" hesabda uduzsa da, oyun planında pis deyildik.

- Ötən tur baş hakim sizə “qırımızı” verməklə ehtiyat oyunçular skamyasından qovdu. Hərə bir söz deyir. Bəziləri qeyd edir ki, referini təhqir etmisiz. Bəs işin əsli nə idi?
- Məni hamı tanıyır, təhqirdən-söyüşdən uzaq adamam. Futbolçu karyeram boyunca da “qırmızı almamışam. Kənardan fərqli görünə bilər, amma ötən tur durduğu yerdə mənə “sarı” verdi. Buna iradımı bildirəndə 2-ci sarı vərəqəni və qırmızını göstərdi. Mən bir daha etiraz etdim. Amma söyüş, təhqir olmayıb.

- Son vaxtlar "Qəbələ"nin məşqçiləri tez-tez hakimlərin qəzəbinə tuş gəlir. Bu gün də Rasim Ramaldanov qırmızı ilə "mükafatlandırıldı”. Hakimlər sizə münasibətdə qərəzlidi?
- Deyə bilmərəm ki, hakimlərin bizlə qərəzi var, ya yox. Hərçənd inanmıram ki, referilər bizə qarşı ikili standartlara əl atsın. Amma verdikləri qərarları da başa düşmək olmur. Bu gün futbolçular arasında qarşıdurma oldu deyə, hamı meydana tökülüşmüşdü. Amma nədənsə referi gəlib köməkçi məşqçimiz Rasim Ramaldanova meydana çıxdığına görə birbaşa “qırmızı” göstərir. Bunu necə başa düşək?! Bütün bunlar da bizə pis təsir edir.

- Son üç oyunu nəzərə alsaq, pis çıxış etmirsiz. "Qəbələ" artıq özünə gəlib, yoxsa görüləcək iş çoxdu?
- Bildiyiniz kimi, gedənlərimiz çox oldu deyə, komanda yenidən formalaşdırıldı. Yavaş-yavaş özümüzə gəlirik, futbolçular uyğunlaşmaqdadılar. Düşünürəm ki, düzgün istiqamətdə irəliləyirik. İndikindən daha yaxşı çıxış edəcəyimizə inanıram.

ABDULLA İSMAYILOĞLU