Sentyabrın 25-də PFL-in saytında “Zaqatala”nın futbolçusu Mahmud Məmmədovla bağlı məlumat yer aldı.

"Football-plus.az" xəbər verir ki, sən demə, 2022/23 mövsümünün “Neftçi-2” – “Zaqatala” matçından sonra ondan götürülən dopinq-test nümunəsi müsbət nəticələnib. Bu səbəbdən futboldan ikiillik diskvalifikasiya edilib.

Bölgə təmsilçisinin baş məşqçisi Rüstəm Məmmədov qəzetimizə açıqlamasında bildirmişdi ki, Mahmudun ürəyində problem olub. Bu səbəbdən də dərman qəbul edib. Həmin həblərin tərkibində dopinq var imiş. Məhz bu səbəbdən Azərbaycan Milli Antidopinq İntizam Komitəsi belə qərar qəbul edib.
Futbolçu ilə bağlı redaksiyamıza maraqlı informasiya daxil olub. Əvvəlcə bunu qeyd edək ki, “Zaqatala”nın peşəkar həkimi yoxdu. Klub şəhər xəstəxanası ilə müqavilə əsasında əməkdaşlıq edir. Bütün problem də bu səbəbdən baş verib. “Neftçi-2” ilə oyun ərəfəsində futbolçu təngnəfəs olduğundan Zaqataladakı poliklinikaya yollanıb. Ordakı həkim futbolçuya soyuqladığını, ciddi probleminin olmadığını bildirib. Resept yazaraq Mahmudun “Kalium riboksin”, “Asbarkam”, “Mildronat” qəbul etməsini istəyib. Həkim futbolçuya birhəftəlik müalicə yazıb. Sözə qulaq asan Mahmud özünü yaxşı hiss edib və “Neftçi-2” ilə oyuna çıxıb. Qarşılaşmadan sonra həm “ağ-qaralar”ın, həm də “Zaqatala”nın 3 oyunçusu dopinq-testdən keçib. Bir ay sonra AMADA futbolçunu dopinqdən istifadə etdiyini bildiribb. Əslində Mahmud 4 illiyə futboldan uzaqlaşdırılmalıymın. Lakin klub buna etiraz edib. Zaqataladakı həkimin yazdığı resepti, oyunçunun analizlərini quruma təqdim ediblər. Bundan sonra cəza müddəti azaldılıb. Lakin zaqatalalılar buna da etiraz ediblər. AMADA-dakı həkimlərdən biri oyunçunun vəziyyətinin qəliz olduğunu, əməliyyata ehtiyac duyduğunu bildirib. Bu səbəbdən Mahmud Mərkəzi Gömrük Hospitalına göndərilib. Ordakı kardioloqun yoxlamasından sonra qorxulu nəyinsə olmadığı bildirilib. Futbolçu müəyyən dərman peraparatlarını qəbul edərək həm məşq edə, həm də futbol oynaya bilər. Hətta “Gömrük”dəki həkim AMADA-dakı həmkarının reaksiyasını gülüşlə qarşılayıb. Bundan sonra “Zaqatala” rəsmiləri Mahmudun cəzasının azaldılmasını tələb edib. Lakin AMADA-dakı hüquqşünas və həkimlər müxtəlif bəhanələrlə bundan imtina edib. Onlar Zaqataladakı tibb işçisinin Bakıya gəlməsini tələb edib. Həmin həkim də rayonda çox tanınmış biridi gündə onlarla xəstəsi olur. Həkim qurumun əməkdaşlarının Zaqatalaya gəlməsini istəyib, həmkarlarına nə üçün bu dərmanları yazdığını izah etməyə hazır olduğunu bildirib. Lakin qurum bunu qəbul etməyib. Əsas problem isə “Mildronat”dan qaynaqlanıb. Bu dərmanın tərkibindəki mildori maddəsi dopinq tərkiblidi. Mahmuda resept yazan həkim bunun idmançılar üçün qadağan olduğunu bilməyib. Əslində bilməli də deyilmiş. Çünki həmin şəxs ürək həkimidi. Sadəcə, xəstəyə yardım üçün lazimi dərmanları məsləhət görüb.

İkiillik cəzadan sonra “Zaqatala” apellyasiya şikayəti vermək istəyib. AMADA rəsmiləri bunda problemin olmadığını bildirib. Lakin bölgə təmsilçisindən müxtəlif sənədlər, arayişlər tələb olunub. Klub da məsələnin çox uzandığını görərək apellyasiyadan imtina edib.

Bir sözlə, ortada böyük problem var. “Zaqatala”nın öz həkimi olmadığından futbolçu əziyyət çəkir. Şəhər poliklinikasında çalışan həkimin yazdığı dərmanları qəbul etdiyi üçün 2 illiyə futboldan kənarlaşdırılıb. Ümumi məlumatsızlıq, anlayışsızlıq belə problemin yaranmasına səbəb olub. İndi ortaya bir sual çıxır: hər şeydə peşəkarlıq tələb edən AFFA, PFL niyə 1-ci liqa klublarından idman sahəsindən anlayışı olan həkimlərlə işləməyi tələb etmir? Onsuz da 1-ci liqada çıxış edənlərin əksəri şəhər poliklinikaları ilə əməkdaşlıq edir. Bəli, onlardan sağlamlıq kağızları tələb olunur. Bəs bu sənədləri təqdim edən həkimlər, xəstəxanalar idmançılara nəyin qadağan olduğunu bilirmi? Mahmudun başına gələnlər poliklinikalarda çalışanların nəyin dopinq olub-olmadığından xəbərsizliyininn sübutudu.

Bu məsələ AMADA da günahkardı. 1-ci liqa təmsilçilərinin həkimlərinə, rəsmilərinə dopinqlə bağlı seminarlar keçməyiblər. Ümid edirik ki, son hadisə həm AFFA-ya, həm də AMADA-ya dərs olacaq, bu qurumlar birlikdə daha yaxşı işlər görəcəklər. Heç olmasa, Azərbaycanda fəaliyyət göstərən bütün klubların həkimlərinə, rəhbərlərinə müəyyən xəstəliklər zamanı istifadə olunan dərmanlardam hansıların tərkibində dopinqin olduğu anladılacaq. AFFA həm 1-ci liqada, həm də premyer-liqada iştirak etmək üçün lisenziya almaq istəyən klubların qarşısına şərt qoy bilər ki, peşəkar idman həkimləri ilə əməkdaşlıq etsinlər. Düzdü, bu bir qədər qəliz məsələdi. Amma tələb olsa, dövlətin ayırdığı maliyyənin müəyyən hissəsi bu istiqamətdə xərclənilsə, məsələ həllini tapar.

İLKİN SULTANLI