“Sentyabrın 29-da dövlət başçısının qismən səfərbərlik haqda Sərəncamı ilə ehtiyatdan ordu sıralarına çağrıldım. Vaxtilə xidmətdə olduğum qoşun növü üzrə (Quru Qoşunları) ordunun komplektləşdirilməsinə cəlb olunduq. Oktyabrın 20-də Füzulinin Aşağı Seyidəhmədli kəndinə yollandıq. Biz ora çatanda artıq kənd azad edilmişdi. Sadəcə, düşmən arabir artilleriya zərbələri endirirdi. Ən yadda qalan döyüş Şuşa-Xankəndi yolunda oldu. Noyabrın 8-də Xankəndi istiqamətində gedən döyüşdə iştirak etmişəm. Xankəndi şəhərinin girişinə qədər irəliləmişik. Bugünlərdə həmin magistral yolun üzərində 30 ildi ermənilərin "qələbə" monumenti kimi qalan və yerindən götürülərək Bakıya gətirilən tankın yanında yaralanmışam. Həmin gün qeyri-bərabər döyüş olsa da, düşmən tanklarının Şuşaya qalxmasının qarşısını ala bildik. Bu gün də cəbhə yoldaşlarımla əlaqəm qalır, tez-tez görüşür, söhbətləşirik. Səhhətimə gəlincə, hər şey qaydasındadı. Əmək və Əhalinin Sosial Müdafiəsi Nazirliyinin ərazi üzrə nümayəndəliyindən zəng edir, səhhətimlə maraqlanırlar. Allah bütün şəhidlərimizə rəhmət etsin, yaralanan, sağlamlıq imkanları məhdudlaşan döyüşçülərə şəfa versin”.