Şuşa – Xankəndi yolunda monitoru İTV quraşdırıb
Son günlər ölkə gündəminə bir olay oturub. Söhbət Rusiya sülhməramlılarının müvəqqəti nəzarətində olan Şuşa - Xankəndi yolunda QHT nümayəndələri, ekoloji fəallar və könüllülərin iştirakı ilə keçirilən etiraz aksiyasından gedir.
Artıq 6 gündü aksiya davam edir. İştirakçılar işğal altında ərazilərimizdə yerləşən qızıl və mis-molibden yataqlarının qanunsuz istismarına qarşı ən müxtəlif şüarlar səsləndirilər.
Aksiyanın başlamasından iki gün sonra isə Azərbaycan Azarkeşlər Birliyinin sədri Atanur Cəfərli də fəallara qoşuldu. Maraqlıdı, birlik üzvləri Şuşa - Xankəndi yoluna necə, kimin dəstəyi ilə gedib? Gecələmək, yemək və başqa problemləri necə yoluna qoyurlar? Bu suallarla Atanur bəyə müraciət etdik:
“Şuşaya getmək üçün təşkilatın adından portal qeydiyyatına müraciət etdik. Ordan təsdiq gələndən sonra yola düşdük. Əslində orda qalmağa yer yox idi. Səhərə qədər ayaqüstəydik. Yemək-içməyi isə Şuşada olan bəzi restoranlar var ki, onlar təmənnasız qarşılayırdılar. Fikirləşirəm ki, bu davamlı olacaq. Biz orda yeni çadırlar qurur, onların sayını artırırdıq. Çünki gələnlərin sayı da artmaqdadı. Sülhməramlılar da öz hazırlıqlarını görürlər. Bu da onu göstərir ki, hərəkat uzun müddət davam edəcək. Hazırda mən Bakıdayam. Lakin tezliklə yenidən Şuşaya qayıtmağı nəzərdə tururam”.
Yeri gəlmişkən, aksiya iştirakçıları Qətərdə keçirilən dünya çempionatının Fransa - Mərakeş oyununu böyük monitordan izləyiblər. Bu isə İTV-nin təşəbbüsü olub. Maraqlıdı, telekanal məhz yarımfinal oyununu yayınlamaq üçün monitor quraşdırıb, yoxsa orda hər gün davamlı canlı yayın gedir? Bundan sonrakı matçlar da eyni üsulla yayınlanacaq? Monitorun quraşdırılması ideyası kimə məxsus olub, buna kim maliyyə dəstəyini verib? Bu sualları isə İTV-nin idman departamentinin direktoru Kənan Hakimova ünvanladıq:
“Oyunun monitorla nümayiş olunması ideyası rəhbərliyə məxsusdu. Üçüncü yer uğrunda və final görüşləri də Şuşa - Xankəndi yolunda quraşdırılan böyük monitorda nümayiş etdiriləcək. Yəni monitor məhz dünya çempionatının oyunlarının nümayişi üçün quraşdırılıb. Bundan sonra isə ekran həmin yerdən yığışdırılacaq. Bütün bunlar İTV-nin daxili imkanları hesabına həyata keçirilib”.
ŞAİR ABDULLA
Digər xəbərlər
