“VAR sistemi işə başlayandan hakimlərə müəyyən inamsızlıq hiss olunur”
Misli premyer-liqasının yeni mövsümündə artıq 7 turu geridə qoymuşuq.
Diqqəti çəkən məqamlardan biri qırmızı vərəqələrin göstərildiyi şəraitdi. Məşqçilər də ən azı futbolçular qədər cəzalanır. Xüsusilə çılğın xarakteri ilə seçilən Samir Abbasov və Murad Musayev diqqət mərkəzindədi. Hətta 7-ci turun “Sumqayıt” – “Turan Tovuz” oyununda Samir Abbasovu əvəz edən Mübariz Orucov da əsəblərinə hakim ola bilmədi, hakimin qərarına sərt şəkildə etiraz etdiyi üçün qırmızı vərəqə gördü. Təbii ki, belə hərəkətlər klubları maddi baxımdan ziyana salmaqla yanaşı, məşqçinin imicinə də ciddi zərər verir. Bu xoşagəlməz hallar bizi səbəbləri araşdırmağa vadar edir. Nə üçün Murad Musayev jurnalistlərə açıqlamalarında tez-tez hakimlərdən şikayət edir? “Kəpəz”lə oyundan sonra baş məşqçi qəti şəkildə İnqilab Məmmədovun qərarlarına etiraz etdi, onun “Sabah”ın növbəti oyunlarına təyinat almasını istəmədi.
Musayev özü də tez-tez intizam qaydalarından kənar davranış sərgiləyir. Elə 3-cü turda oyunun son dəqiqələrində lazımsız hərəkətlə oyunun bərpasını ləngitdiyi üçün qırmızı vərəqə ilə cəzalandırılmışdı. Halbuki “Kəpəz”lə qarşılaşmadan sonra rəqib futbolçuları oyunun tempini öldürdükləri üçün sərt tənqid edən də Murad Musayev idi. Başverənlərdən belə nəticə çıxarmaq olar ki, günah heç də həmişə hakimlərdə və ya məşqçilərdə deyil. İstənilən halda, cari mövsümdə məşqçilərlə hakimlər arasında müəyyən gərginlik var. Bunun səbəbini müəyyənləşdirmək üçün mütəxəssislərə müraciət etdik.
Sabiq hakim Fariz Yusifov oyunları müntəzəm izlədiyini, hakim qərarlarını diqqətlə təhlil etdiyini deyir:
“Mənə elə gəlir ki, premyer liqada VAR sistemi işə başlayandan hakimlərə müəyyən inamsızlıq hiss olunur. Məşqçilər başa düşməlidi ki, nə olur-olsun, intizam qaydaları çərçivəsində davranmaq lazımdı. Hakimlərin əksəriyyəti gənc nəslin nümayəndəsidi. Təbii ki, komitə onlara texniki zonadakı qayda pozuntularına qarşı ciddi tədbir görməyi tapşırır. Hakimlərin meydanda nüfuzunun zəifləməsinin əsas səbəbi kimi mən yenə də VAR sistemini görürəm. Meydanda hakimin nüfuzu futbolçulardan da, baş məşqçidən də üstün olmalıdı. Lakin təəssüf ki, hazırda əksər hakimlərimizdə özlərinə qarşı da inamsızlıq hiss olunur. Oyunların ağırlıq dərəcəsi baş məşqçilərin davranışına ciddi təsir göstərir. Hakimlərə tövsiyə edirəm ki, bu amili nəzərə alsınlar. Yaxşı olar ki, gənc hakim təyinatları olduqda baş məşqçilər oyunlardan əvvəl fürsət tapıb onlarla ünsiyyətdə olsunlar. Bizim vaxtımızda komandalar oyundan əvvəl isinmə hərəkətlərini yerinə yetirərkən hakimlər də isinmə hərəkətləri üçün meydana çıxırdılar. Bu zaman məşqçilərlə ünsiyyət üçün fürsət yaranırdı. Bu, oyun ərzində anlaşılmazlıqlar yaranarkən problemin daha tez həll olunmasına kömək edirdi. Düşünürəm ki, hakimlərlə məşqçilər arasında hansısa gərginlik yaranmaması üçün ünsiyyət vacibdi”.
Tanınmış futbol mütəxəssisi Aslan Kərimov da düşünür ki, oyunların ağırlıq dərəcəsi və məsuliyyətin böyüklüyü baş məşqçilərin çılğın hərəkətlərlə yadda qalmasına səbəb olur. Onun fikrincə, Avropanın aparıcı çempionatlarında da belədi. Lakin liqamızdan fərqli orda baş məşqçilərə tez-tez qırmızı vərəqə göstərilmir. Gənc hakimlərlə bağlı Fariz Yusifovla bənzər fikirlər səsləndirən Aslan Kərimov başqa məqamlara da diqqəti yönəltdi:
“Əksər gənc hakimlərimiz özlərini təsdiqləmək üçün bəzən gözlənilməz sərt qərarlar verirlər. Təcrübəli hakimlərin gərginliklərə daha təmkinli yanaşdıqlarını görürük. Bəzən görürük ki, texniki zonada əyləşmiş məşqçilər hakimlərə xoşagəlməz ifadələr ünvanlayır. Bu vəziyyətlərdə gənc hakimlər daha qəti davranıb, sərt cəzalar verirlər. Təcrübəli hakimlər isə belə hallar yaşananda oyunun ağırlıq dərəcəsini də nəzərə alırlar. Ümumiyyətlə, baş məşqçi nə qədər sakit və nizam-intizamlı olarsa, komandasına da bir o qədər xeyir vermiş olar. Bəzən məşqçilər qəsdən hakimə təzyiq göstərib, oyunun nəticəsinə təsir göstərməyə çalışırlar. Belə olan halda gənc hakimlər manipulyasiyadan yayınmaq üçün sərt qərarlara gedə bilirlər. Yekunda onu deyə bilərəm ki, oyunlarda gərginliyin artması və məşqçilərə qırmızı vərəqələrin çıxmasında hər iki tərəfin günahı var”.
Cari mövsüm başlayandan rəsmi şəxslərə artıq 20 sarı, 5 qırmızı vərəqə göstərilib.
ADİL NƏHMƏTLİ
Digər xəbərlər
