David Silva yeni mövsüm ərəfəsində ciddi zədə alıb. O, buna görə yaşıl meydanı tərk etməyi düşünür.

"Football-plus.az" xəbər verir ki, “Real Sosyedad”ın yarımmüdafiəçisi məşqdə sıradan çıxıb.

37 yaşlı futbolçunun sol dizinin xaçvarı bağları qırılıb. Onun aqibəti bu həftəyə nəzərdə tutulan geniş müayinə nəticəsində məlum olacaq. Qeyd edək ki, idmançılar bu tip zədə üzündən, adətən, bir neçə aylığa sıradan çıxırlar. Bunu nəzərə alan David karyerasını başa vurmağı düşünür. Onun müddəti 2024-cü ilə qədər nəzərdə tutulan müqaviləsinin qarşılıqlı razılıq əsasında pozulacağı xəbər verilir.

Silva “Real Sosyedad”da 2020-ci ildən çıxış edir. O, ötən mövsüm 34 matçda meydana çıxıb, 3 qol vurub və 7 məhsuldar ötürmə verib. 2010-20-ci illərdə “Mançester Siti”də çıxış edən yarımmüdafiəçi bu komandada 309 oyunda meydana çıxıb və 60 qol vurub. “Şəhərlilər”lə 4 dəfə İngiltərə çempionluğunu qazanan Davidin İspaniya yığması ilə AÇ-2008, AÇ-2012 və DÇ-2010-un qalibi olduğunu da bildirək.