“Hakimlər briqadası matçın sona kimi ədalətli keçməsini böyük ölçüdə təmin etdi” - Tahir Süleymanov
"Qarabağ"ın "Nant"la səfər görüşündə ədaləti danimarkalı Yakob Kehletin rəhbərlik etdiyi hakimlər briqadası qoruyurdu.
Football-plus.az xəbər verir ki, referi tempi maksimum yüksək saxlamaqla komandaların açıq futbol oynamasına şərait yaratdı. Hər kiçik qayda pozuntusuna görə oyunu dayandırmadı. Danimarkalıların işini daha detallı Tahir Süleymanov dəyərləndirəcək:
"Nant" - "Qarabağ" matçı psixoloji baxımdan hakim idarəçiliyi adına məsuliyyətli, ağır idi. Danimarkalı referi ilk dəqiqələrdən tribunaların fantastik dəstəyinə uyğun bəzi anlarda yerli komanda adına kiçik epizodları diplomatik gedişlərlə tənzimləyirdi. Hissənin ortalarına kimi belə davam etdi. Oyunu, azarkeşləri psixoloji olaraq tam ələ alandan, idarəçiliyini hər iki komandaya qəbul etdirəndən sonra qarşılaşmaya yanaşma dəyişdi və meydanda obyektivliyin faiz dərəcəsi yüksəldi. “Qarabağ” qapıçının bəsit səhvindən sonra qol buraxsa da, komandanın ilk rolda, son dərəcə intizamlı, qaydalar çərçivəsində çıxış etməsi, rəqibdən çəkinməməsi hakimlər briqadasının da özünəinamını artırırdı. Matçın önəmi hər iki komanda üçün vacib olsa da, futbolçular meydanda kobudluğa yox, oyuna köklənmişdilər. Bu amil referinin idarəçiliyini asanlaşdırır, səhvləri minimuma endirir, sərt mübarizə kobudluğa keçmirdi. Bunda danimarkalının da əməyi qeyd olunmalıdı. Buna görə də korrekt keçən oyunda ilk sarı vərəqə hissənin sonuna təsadüf etdi”.
Təcrübəli referinin ikinci yarı haqda qeydləri isə belə oldu:
“Hesabda geridə olan "Qarabağ" fasilədən sonra təzyiqi artırdı. Penalti epizodu danimarkalı referinin hesabna yazılmalıdı. Bir tərəfdə Fransa klubu, digər yanda Azərbaycanın "Qarabağ"ı... Hər hakim məsuliyyəti üzərinə götürüb, təzyiq altında səfər komandasının xeyrinə qətiyyətlə belə qərar qəbul etməzdi. VAR oldu-olmadı, baş hakimin cəsarətli qərarı alqışalayiqdi. Bərabərlik təmin olunandan sonra qarşılaşmanın sürəti artdı, daha açıq oyuna üstünlük verildi. Referi buna da hazır idi. Təcrübəsi, təmkinli idarəçilik tərzi ilə görüşün “ip”ini əlində saxlayırdı. Uzatma dəqiqələrində qol vurulsa da, final fitindən sonra komandaların ondan şikayət etməsi mümkün deyildi. Hakimlər briqadası matçın sona kimi ədalətli keçməsini böyük ölçüdə təmin etdi. Bu görüş hakimlik adına Danimarka təmsilçilərinin hesabına yazıla bilər. "Qarabağ"a almanlarla qrupun son matçında uğurlar!"
ABDULLA İSMAYILOĞLU
Digər xəbərlər
