"Hansısa komandanın çıxışında daimi sabitlik yoxdu. Hardasa eniş-yoxuşa məruz qala, dalana ilişə bilirsən. Bu "Sabah"a da aiddi. Amma Masazır təmsilçisinin tənəzzülü sanki adət halına çevrilməkdədi. Mən bunun başlıca səbəbini komandanın iki düşünən beyni, vuran ayağı olan Kaşukla Mikelsin gedişində görürəm. Çoxları fikirimlə razılaşmaya bilər, amma onların gedişi oyun planını məhv edib. Hazırda komanda irəlidə yaradıcılığı ilə seçilən futbolçulardan məhrumdu. Apeh qabaritli forvarddı. O, rəqib müdafiəçiləri təzyiq altında saxlamaqla sirkələyə bilir. Volkov isə hücumçu kimi üzərinə düşən işin öhdəsindən gələ bilmir. Gürcü futbolçunun, ümumiyyətlə, "Sabah" kimi iddialı komandada olması düzgün deyil. Onun yeri elə "Qəbələ" idi. Bununla həm özünə, həm də bölgə təmsilçisinə fayda verərdi. Bəziləri deyə bilər ki, "bayquşlar" Kaşuksuz Konfrans Liqasında 3 qələbə qazandı, Mikelssiz "Partizanı doğma meydanda məğlub etdi. Bu uzaqdan baxışdı. Amma işin dərinliyinə getsək, başqa nüanslar üzə çıxır. Əvvəla "Sabah"ın qitəmiqyaslı yarışlarda uğurunun səbəbi rəqiblərin onu lazımınca qiymətləndirməməsiydi. RFŞ ilə oyunlara nəzər yetirsək, görərik ki, latviyalılar oyun planında, kreativlikdə, hücumlarda bizi üstələmişdi. "Partizan", ümumiyyətlə, “Sabah”ı yaxından təhlil etməmişdi. Rəqib ancaq ilk oyundan sonra "bayquşlar"ı tanıya bildi və Belqraddakı qarşılaşmada da gücünü göstərdi. Həmçinin onu da vurğulamaq lazımdı ki, hazırkı "Partizan"da güclü deyil, çox zəifləyib. Odu ki, elə avrokuboklardakı uğursuz çıxışdan indiyə kimi davam edən yenilgilərin səbəbi məhz aparıcı oyunçuların komandadan getməsinə və zədəyə görədi. Təbii ki, ardıcıl məğlubiyyətlər və qol vura bilməmək mənəvi böhranı daha da dərinləşdirir. Hazırda "Sabah"da oyun ritmi itib, “vuran ayaq” isə yoxdu. Yeni oyunçular hələ uyğunlaşma dönəmini keçə bilməyib. Son turda "Qarabağ"la oyuna baxsaq, ağdamlıların üstün və rahat çıxış etdiyini görərik. Qısası, "köhlən atlar"ın başı hələ avrokuboklara qarışıb. Onlar Masazır təmsilçisiylə oyundakı kimi tempi artırsa, bütün klublara güc gələcək. Başqa bir tərəfdən, "Qarabağ"ı kənara qoyub, digər komandaları təhlil etsək, "Zirə"dən çoxları belə start gözləmirdi. “Zirə” qol vurduqca, qələbə qazandıqca iştahı artır. Odu ki, qəsəbə təmsilçisi niyə də çempionluq üçün oynamasın?! Eləcə də ilk "4-lük" uğrunda mübarizəni götürsək, "Səbail"in, "Turan Tovuz"un iştahı artıb, "Araz-Naxçıvan"ın 10 xal toplayaraq ilk "4-lüy"ə qədər gəlib çıxmasını da unutmayaq. Sözüm budu ki, hazırkı mənzərəni nəzərə alsaq, "Sabah"ın da uğurusuzluğu davam etsə, heç ilk "5-lik" qalacağı da inandırıcı deyil. Düşünürəm ki, Murad Musayevi "Kəpəz"lə də asan oyun gözləmir. Bir nüansı da qeyd edim: "bayquşlar"ın ötən mövsümdəki yaxşı performansına görə qalan klublar artıq onu daha ciddi qəbul edir, dərindən təhlil aparır. Masazır təmsilçisi gəncəlilərlə matçda qələbə qazanmalıdı. Əks təqdirdə klub rəhbərliyinin baş məşqçiyə sərt tənqidi və xəbərdalıq etməsi qaçılmazdı. Eləcə də gəlin, "Kəpəz"i “qapazaltı” komanda saymayaq. "Sarı-göylər" maliyyə sıxıntısına rəğmən, yaxşı döyüşürlər. Məğlub olduqları oyunlarda da qol axtarışında olurlar. Həmçinin Gəncə təmsilçisinin lider komandalara qarşı daha yaxşı oynadığını da görmüşük. "Neftçi"ni məğlub etdilər, "Qarabağ" səfərindən xalla döndülər. Niyə də Masazır səfərində uğur qazanmasınlar?! Odu ki, "Sabah"ı "Kəpəz”lə də ağır, gərgin oyun gözləyir. Komanda toparlanmaq üçün qələbə qazanmalıdı. Əks təqdirdə böhran dərinləşəcək".