Ötən yazılarımızdan birində 2-ci liqa təmsilçiləri arasında qəribə adların olmasıyla ("Sheki City", "Sportinq Baku") bağlı mövzuya toxunmuşduq.
Amma sevindirici məqam da var. Belə ki, Region Liqasının yeni mövsümündə də milli ad daşıyıcısı olan komandalar görəcəyik. Bir çox klub ya fəaliyyətini bərpa edib, ya da yenidən yaranıb. Onlar arasında 1960-cı ildə Yevlaxda yaradılan "Qarxun", ardıcıl iki dəfə Region Liqasının qalibi olan Sumqayıt "Uğur"u, "Gənclik", "Ramana" (2015), "Dirçəliş", "Ərgünəş", "İsmayıllı", yeni yaradılanlar arasında isə "Hacıqabul", "Göyçay", "Mil Beyləqan", "Ağcabədi" var. Digər xoş xəbər odu ki, köklü komandalardan "Göyəzən", "Masallı", "Neftçala", "Qobustan", "Xəzər-Lənkəran 42", həmçinin ötən mövsümün finalçısı "Çinar" da iştirakçılar sırasında var. Turnirə qatılmaq istəyənlər üçün qeydiyyat müddəti dünən bitib və qarşıdakı saylarımızda iştirakçıların tərkibi ilə bağlı ətraflı məlumat verəcəyik. Xüsusi qeyd etmək lazımdı ki, vaxtilə mövcud olmuş komandaları fəaliyyətini bərpa edirlərsə, heç olmasa, 2-ci liqada çıxış etməyi haqq etdikləri halda, yenə Region Liqasında yarışacaqlarsa, onlara maksimum dəstək vermək lazımdı. Bölgələrdə futbolu inkişaf etdirmək istəyiriksə, Region Liqasının səviyyəsini yüksəltmək, rayonların vaxtilə mövcud olmuş komandalarını bərpa etmək lazımdı. Niyə ilk futbol klublarımızdan olan "Balaxanı"nı, "Temp"i, almanların Tovuzda əsasını qoyduğu, hətta 2000-ci illərin əvvəlində 1-ci liqada da çıxış edən "Rote Fahne"ni, Masallının "Viləş", Sabirabadın "İnşaatçı", Şəkinin "İpəkçi", Bərdənin "Pambıqçı" ilə "ABN-Bərdə", "Suraxanılı", "Bakı fəhləsi" və bir çox başqa adları bərpa etməyək?!
Bir məqamı dəqiqləşdirək ki, vaxtilə mövcud olmuş komandaları bərpa etməklə həm regionlarda və bütövlükdə ölkədə futbolu populyarlaşdıraq, həm tarixi unutqanlığı aradan qaldıracaq, həm də 1-ci və 2-ci liqaların inkişafına təkan verəcəyik. Yaxın illərdə bütün liqalarda klub sayını artırmaq, 2-ci liqanı tam peşəkarlaşdırmaq lazımdı. Region Liqası ölkə futbolu üçün istedadlı gənclər yetişdirən və daha peşəkar komandalara keçidə səbəb olan platforma rolunu oynayacaqsa, həmin klublara AFFA tərəfindən bəlli məbləğdə pul təzminatı və fərqli üsullarla dəstək verilməlidi. İnanmaq istəyirəm ki, Region Liqasında da bu mövsüm rəqabətli, maraqlı oyunlar izləyəcəyik.

ABDULLA İSMAYILOĞLU