Noyabrın 13-də Region Liqasında ilk turun oyunları keçirilib.

Cənub regionu

Cənub regionunda 3 qarşılaşma baş tutub ki, ikisində meydan sahibləri qələbə qazanıb. Bir qarşılaşma isə qolsuz başa çatıb. Ötən illərdə daha çox autsayder kimi görməyə adət etdiyimiz “Qobustan” yeni mövsümə uğurlu start verib. Samir İsayevin çalışdırdığı komanda debütant “Xəzər Lənkəran 42”ni meydana çıxmağa peşman edib. Qobustanlılar Lənkərandan gələn qonaqların qapısından 5 cavbsız top keçirib. “Zəfər 44” isə “Ərkivan”ı evə əliboş yola salıb. Cəlilabad təmsilçisi azarkeşlərinə 4 qol hədiyyə edib. Liqanın daha bir debütantı “Lerik” lk oyununda “sülh bağlayıb”. Meydan sahibləri “Neftçala”nın müqavimətini qıra bilməyib.

13 noyabr

Qobustan - Xəzər Lənkəran 42 5:0
Zəfər 44 (Cəlilabad) – Ərkivan (Masallı) 4:0
Lerik - Neftçala 0:0
Bombardirlər: Arzuman Nəsibov (Qobustan), Fariz Nəbiyev (Zəfər 44) – 2.

Mərkəz regionu

Mərkəz regionunda da 3 qarşılaşma keçirilib. “Ağsu Siti” səfərdə “Ərgünəş”ə boyun əyib. “Araz” Saatlıda “İsmayıllı”nı məğlub edib. Nəinki regionun, cari mövsümün favoriti kimi göstərilən “Füzuli” iddiasını ilk turdan ortaya qoyub. “Sarı-qaralar” “Ağsu-06”nı 5 dəfə meydanın mərkəzinə dəvət edib. Meydan sahibləri yalnız bir dəfə qonaqların torunu silkələməyi bacarıb.

13 noyabr

Ərgünəş (Füzuli) - Ağsu Siti 1:0
Araz (Saatlı) - İsmayıllı 3:1
Ağsu-06 - Füzuli 1:5

Paytaxt regionu

Paytaxtda artıq ilk turdan darmadağınlar qeyd alınıb. “Mübariz” “Bakı Atletik”i, “Qusar” isə “ASK Arena”da baş tutan görüşdə “Gəncliy”in daşını daşüstə qoymayıb. Şirvanovkada keçirilən görüşdə isə komandalar qolsuz “sülh”ə razılaşıb. B qrupunda “Difai” “Cürət”ə, “Çinar-Zəngilan” isə “İrəvan”a futbol dərsi keçib. Ötən mövsüm Region Liqasının qalibi olan “Cəbrayıl” ilk turda xal itirib.

A qrupu

Bakı Atletik - Mübariz 2:11
Gənclik (Bakı) - Qusar 0:12
Şirvanovka (Qusar) - Dirçəliş (Bakı) 0:0
Bombardilər: Cəfər Şahmuradov (Mübariz) – 8, Sərxan Ağayev (Qusar) – 5.

B qrupu

Cürət - Difai 2:10
İCBFA - Cəbrayıl 2:2
Çinar-Zəngilan - İrəvan 12:0
Bombardirlər: Sergey Markelov (Çinar-Zəngilan) - 4, Qabil Əlizadə (Çinar-Zəngilan) - 3.

Şimal-Qərb regionu

Şimal- Qərb regionunda ilk turda azarkeşlər dörd qarşılaşmaya şahidlik edib. Liqa təcrübəsi olan “Karvan”ın “Göygöl”ü yenəcəyi gözlənilən idisə, debütant “Marxal”ın Çətin Şəmkir səfərindən əlidolu dönəcəyi bir qədər təəccüblü oldu. “VT Gəncə” də azarkeşlərini məyus edib. Göygöl Olimpiya Kompleksinin meydanında baş tutan görüşdə gəncəlilər “Ağstafa”ya yenilib. Ölkənin ən köklü klublarından olan “Göyəzən” də turu qələbə ilə başa vurub. “Qurutlar” Qazaxda “Şəki”dən üstün olub.

Karvan (Yevlax) - Göygöl 2:0
VT Gəncə - Ağstafa 2:3
Qala (Şəmkir) – Marxal (Şəki) 0:1
Göyəzən (Qazax) - Şəki 5:2
Bombardirlər: İslam Piriyev (Göyəzən) – 3, Elgün Namazov (Ağstafa) – 2.