1-ci liqada ilk tur arxada qaldı. Həftə ərzində 5 maraqlı görüş izlədik.

"Football-plus.az" xəbər verir ki, turun ən gərgin matçı Yevlaxda keçirildi. Burda “Karvan” “Mingəçevir”i qəbul edirdi.

“Ağ-qaralar” “şəhərlilər”i 4:1 hesabıyla məğlub etdi. Nəticədən daha çox meydanda yaşanan dava-dalaş gündəmə gəldi. “Karvan”ın üzvü Müşfiq Teymurov 3-cü qoldan sonra qonaq azarkeşlərə münasibətdə ədəbsiz jest etdi. Ardından “şəhərlilər”in kapitanı və qapıçısı olan Elçin Qasımov onun üzərinə şığıyaraq vurmaq istədi.

Bundan sonra olanları bilirsiz. Baş hakim Rövşən Rəcəbov “Karvan”dan Müşfiq Teymurova, “Mingəçevir”dən Elçin Qasımovla Elvin Əlizadəyə qırmızı vərəqə göstərərək meydandan qovdu. Qonaq komandanın rəhbərliyi bu məqamdan narazıdı. Onlar hakimin Müşfiq Teymurovun hərəkətini görmədən gəldiyini iddia edirlər. Yalnız yan xətt hakimi Tərlan Talıbzadənin müdaxiləsindən sonra Rövşən Rəcəbovun “Karvan”ın oyunçusunu meydandan qovduğunu bildirirlər. Yəni baş hakim vaxtında hadisələrə müdaxilə etməyərək “Mingəçevir”in oyunçularının qırmızı vərəqə almasına şərait yaradıb. Bu səbəbdən də Aran təmsilçisi Rövşən Rəcəbovun idarəçiliyindən narazıdı.

Ümumiyyətlə, “Mingəçevir” rəhbərliyi qarşılaşmadan öncə bu hakimin oyuna təyinat almasını istəməyib. Çünki hələ klub “Energetik” adlanan zaman Region Liqasının 1/4 finalında “Cəbrayıl”la cavab görüşünü məhz Rövşən Rəcəbov idarə etmişdi. Həmin oyunda da hakim “işıqçılar”ın xeyrinə penalti təyin etmədiyinə görə dava düşmüşdü. Bundan başqa, referi 2022/23 mövsümünün “Mingəçevir” - “Qaradağ Lökbatan” oyunda da meydan sahiblərinin əlehinə qərarlar qəbul etmişdi. Klub rəhbərliyi bu görüşdəki idarəçilikdən də narazı qalmışdı.

Bütün bu olanları bir yerə cəmləyən “Mingəçevir” Rövşən Rəcəbovdan şikayət edəcək. Aran təmsilçisinin rəhbərliyi referi ilə bağlı fikirlərini AFFA prezidenti Rövnəq Abdullayevə, baş katib Sərxan Hacıyevə, PFL prezidenti Elxan Səmədova və Hakimlər Komitəsinin sədri Barış Şimşəyə yazılı məktubla bildirəcək. “Mingəçevir”in əsas istəyi Rövşən Rəcəbovun bir daha onların oyunlarına təyinat almamasıdı.

Yuxarıda sadaladıqlarımız klubun bu addımı atmasına əsas verir. Lakin adı çəkilən qurumların və şəxslərin bu müraciətə hansı cavabı verəcəyi və nə qərar verəcəyi də önəmlidi. Ona qalsa, indiyə qədər ölkədə oxşar tələblə çıxış edən və tələbi yerinə yetirilməyən onlarla klub olub.

İLKİN SULTANLI