Misli premyer-liqasında 6-cı tura start verilib.

“Football-plus.az” xəbər verir ki, “Zirə” “Sumqayıt”ı qəbul edib - 1:0. Matçdan sonra meydan sahiblərinin çalışdırıcısı Rəşad Sadıqovun mətbuat konfransı keçirilib. Sizi onun fikirləri ilə tanış edirik:

- Hakimliklə bağlı nə deyə bilərsiz?
- Bu barədə danışmaq istəmirəm.

- Komanda 6 turdu ki, liderdi. Tam komplektləşmisiz?
- Son ana qədər danışıq apardığımız futbolçular var idi. Daha iki transfer etmək istəyirdik. Təəssüf ki, alınmadı. Artıq bunu qış fasiləsində edəcəyik. Bu gün komandada olan futbolçuların performansından razıyam. Amma təbii ki, güclənməyə ehtiyac var. Transfer pəncərəsi bağlandı. Bəlkə də azad agent statusunda olan və bizi qane edən futbolçu olsa, götürəcəyik.

- Hansı mövqelərə transfer lazımdı?
- Hücumameyilli oyunçu istəyirdim. Danışıqlar aparırdıq, son anda alınmadı. Ən azı bir mərkəz müdafiəçisi də götürməliydik. Bu mövqedə bir oyunçumuz zədələnsə, onu əvəz etməyə futbolçu yoxdur. Məşqçi işi belədi. Hər şey sənin istədiyin kimi gedə bilməz.

- Çantakiasın start heyətində olmamasının səbəbi nə idi?
- Ümumiyyətlə Çantakias bu il yaxşı performans göstərir. Həyətimizdə ən çox oyun keçirən futbolçulardandı. Bu gün 100-cü oyununu keçirirdi. Onu da Qismət Alıyevi də təbrik edirəm. Bu gün rotasiya etdik. Çantakiasın üç sarı vərəqəsi var. Hər üç mərkəz müdafiəçisi daim yaxşı formada olmalıdı. Onların heç birinə əvəzedici oyunçu kimi baxmıram. Müəyyən detallar rəqabətdə rol oynaya bilər.

- İlkin Muradovun start heyətində oynamasında həlledici amil nə idi?
- Bəzən İlkinin ərköyünlüyü olur. Bu olmadığı halda planlarımıza uyğun oyunçudu. Bu gün də çox yaxşı oyun nümayiş etdirdi. Hazırlığı yaxşı səviyyədə idi. Müəyyən xırda problemlər var idi. Onu aramızda həll etdik.

- "Zirə"yə qarşı hər zaman təzyiqlər olur. Yenə də bunu hiss edirsiz?
- Daha çox yaxşı gedəndə bunu hiss edirik. Mən nəsə qərəz olduğuna inanmıram. Çünki, bu il hakimlərimiz çox yaxşı performans göstərir. Müəyyən səhvlər yəqin ki, gələcəkdə də olacaq. Hələ qırmızı vərəqə epizoduna baxmamışam. Ona görə də səhv olub-olmadığını dəqiq deyə bilmərəm. Təbii ki, nə iləsə əlaqələndiriləcək. Çempionatımızda bu cür epizodlar həddindən çoxdu. İstərdim ki, hakimlərimiz minimum səhv etsinlər. Bütün komandalar böyük həvəslə mövsümə başlayıblar. 10 komandanın hansınısa digərlərindən ayırmaq olmur. Hamı yaxşı mübarizə aparır, məşqçi işi görünür. Bu, sevindirici amildi. Bütün komandaların oyununda irəliləyiş var. Hakimlərin çiyninə ağır yük düşəcək. İnşallah öhdəsindən gələrlər.