Misli premyer-liqasında 3-cü tura start verilib.

“Football-plus.az” xəbər verir ki, “Kəpəz” evdə “Turan Tovuz”a uduzub - 0:2. Oyundan sonra meydan sahiblərinin çalışdırıcısı Azər Məmmədovun mətbuat konfransı keçirilib. Sizi mütəxəssisin fikirləri ilə tanış edirik:

- Qapıçınız kobud səhvlərlə yadda qalır. Bu mövqeyə transfer gözlənilir?
- Məğlubiyyəti kiminsə üstünə atmaq istəmirəm. Futbolda səhvlər də olur, yaxşı anlar da. "Neftçi"ni udanda səhvlər görünmürdü. Razıyam, səhvləri oldu. Amma o da istəməzdi ki, qollar buraxaq. Qapıçı transferi yox, amma başqa mövqelərə gözlənilir.

- Transfer məsələsi nə yerdədi? Razılıq əldə etdiyiniz oyunçular var?
- Nə qədər çətin olsa da, ağlamaq fikrim yoxdur. "Kəpəz"ə gələndə özümə belə söz vermişəm. Bu şərait və büdcə ilə razılaşmışamsa, axıra kimi əlimdən gələni edəcəm. Hazırkı futbolçularla davam edəcəm. Bəli, çətindi. Çalışacağıq ki, bu istiqamətdə işlər görək.

- Məğlubiyyətə erkən buraxılan qol, yoxsa Mate Kvirkviyanın zədələnməsi?
- Mateyə görə çox təəssüflənirəm. Tibbi baxışdan sonra durumu bilinəcək. Oyunu uduzduq, amma futbolçu itirmək bizim üçün çox ağırdı. Oyuna gəlincə, qola kimi futbolçular meydanda mənim istədiklərimi yerinə yetirirdilər. Futbolçulara tapşırmışdım ki, ehtiyatlı oynamaq lazımdı. Belə də başlamışdıq. Gözləmədiyimiz anda qol buraxdıq. Bu da sınma nöqtəsi idi.

- Hücum xəttinə transfer fikriniz var?
- Müdafiə planında yaxşıyıq. Hücumdakı durumdan razıyam. Bu haqda düşünürük. Hücum oyunuçuların hərəsinin üzərinə düşən iş var. Onlara tapşırmışıq ki, bir az artırmaq lazımdı. Bu baş versə, qollar da gələcək. Getdikcə hər şey yoluna düşəcək. Bir neçə transferlə oyunumuzda yaxşıya doğru dəyişiklik olacaq.

ABDULLA İSMAYILOĞLU