AFFA Zubiri “milliləşdirməsə” də, “Qarabağ”da yerli statusla oynaya bilər
Abdulla Zubir artıq beş ildi ölkəmizdə çıxış edir. Mərakeş əsilli fransalı bu müddət ərzində “Qarabağ”ın uğurları üçün tər töküb. Belçika ilə görüşə kimi vingerin “milliləşdirilmə” məsələsinin həll olunacağını düşünürdük. Görünür, AFFA bunda maraqlı deyil.
Zubirə Azərbaycan pasportunun verilməsi həm milliyə, həm də “Qarabağ”a faydalı ola bilərdi. Ən azı 31 yaşlı futbolçu premyer-liqada Ağdam təmsilçisinin heyətində yerli futbolçu statusu ilə oynayacaqdı. Bu isə Qurban Qurbanovun işini bir qədər asanlaşdıracaqdı. Nəzərə alaq ki, 2023/24 mövsümünün “transfer pəncərəsi”ndə “köhlən atlar”ı 4 yerli futbolçu tərk etdi. Bunlar Ramil Şeydayev, Musa Qurbanlı, Qara Qarayev və Filip Ozobiçdi. Belə məqamda Zubirin “milliləşdirilməsi” Ağdam təmsilçisi üçün göydəndüşmə olardı.
Amma görünən odu ki, bu, mümkün olmayacaq. Görəsən, vingerin Azərbaycan millisinə çağrılmaması halında “Qarabağ”da yerli statusu ilə oynamaq imkanı varmı? Məsələn, Türkiyə superliqasında 5 il müddətinə çıxış edən futbolçular var ki, onlar legioner sayılmır. Ərən Dərdiyok, vaxtilə Mərt Nobre bu fürsətdən yararlanıb. Bizdə bu imkan varmı? Azərbaycan qanunvericiliyində əcnəbilərin vətəndaşlıq prosesi necədi? Zubir milliyə dəvət almasa da, premyer-liqada yerli futbolçu statusu ilə oynaya bilər? Hüquqşünas Bəxtiyar Rüstəmovun fikirləri:
“Azərbaycan Respublikasının ərazisində iki ildən artıq daimi yaşayan, işləyən, ölkəyə ziyan vurmayan hansısa əcnəbi şəxs Azərbaycanın vətəndaşı olmaq üçün müraciət edə bilər. Dövlətimizin qanunlarında 5 il söhbəti yoxdu. Bu, FIFA-nın tələbi və qaydasıdı. Yəni qurum istəyir ki, hansısa futbolçu ən azı 5 il bizim ölkəmizin çempionatında çıxış etsin. Vətəndaşlığın alınmasının isə buna aidiyyatı yoxdu. Burdakı əsas tələblərdən biri Azərbaycan dilini bilməkdi. Normal prosedur belədi. Futbolçuların çoxu “milliləşdirildiyi” üçün dili bilmək tələb olmur. Çünki onlara millimizə xeyir vermələri üçün Azərbaycan pasportu verilir. Başqa yol da var. Məsələn, hansısa futbolçunun valideynlərindən biri azərbaycanlı olarsa, həmin şəxs ölkəmizin vətəndaşlığını almaq hüququna malikdi. Anatoli Nuriyev, Ayaz Quliyev, Azər Əliyev, Aleksey İsayev belə şəxslərdəndi. Zubir məsələsi fərqlidi. Onu AFFA “milliləşdirmək” istəmirsə, futbolçu özü dövlətə müraciət edərək Azərbaycan vətəndaşlığını ala bilər. Məsələn, Azərbaycan qanunvericiliyi imkan vermir ikili vətəndaşlığa. Amma başqa ölkələrdə belə problem yoxdu. Bu, təkcə azərbaycanlılara aiddi. Yəni bizim millətin nümayəndəsinin ikili vətəndaşlığı ola bilməz. Lakin Zubir və ya başqaları bundan istifadə edə bilər. Bildiyim qədəri ilə bir çox ölkədə belə problem yoxdu”.
Gördüyünüz kimi, futbolçu istəsə, Azərbaycan vətəndaşlığını ala bilər. Bunun üçün müraciət etməlidi. İndi Zubir “Qarabağ”a daha çox fayda vermək üçün Azərbaycan vətəndaşı olmaq istəyəcəkmi? Bax, bu, məsələni aydınlaşdıracaq əsas sualdı.
İLKİN SULTANLI
Digər xəbərlər
