Abdulla Zubir “Qarabağ”ın hazırda ən parlaq oyun münayiş etdirən oyunçularından biri, bəlkə də birincisidi.

Mərakeş əsilli fransalı həm çempionat, həm də avrokubok matçlarında Qurban Qurbanovun güvəndiyi futbolçudu. Vinger meydanda olmayanda “köhlən atlar”ın oyununda açıq-aşkar eniş hiss olunur.

31 yaşlı futbolçu 2018-ci il iyulun 1-də “Lans”dan Ağdam təmsilçisinə keçib. Artıq bu tarixdən 5 il ötüb. Yəni Zubiri azərbaycanlı sayılır. Vingerin “milliləşdirilməsi” ilə bağlı dəfələrlə “Futbol+” qəzetində və “Football-plus.az” saytında məqalələr yazmışıq. Lakin məsələ ilə bağlı konkret nəsə yoxdu. AFFA-nın baş katibi Sərxan Hacıyev mediaya açıqlamasında bildirmişdi ki, Zubirin milli komandamızın formasını geyməsi alınmayacaq. Çünki federasiya strategiyanı dəyişib. Artıq gənc oyunçuların yetişdirilməsinə daha çox diqqət ayrılacaq. Guya əcnəbilərin yığmada oynaması komandamıza fayda vermirmiş.

Gəlin “Qarabağ”ın vingerinin 2022/23 mövsümdəki performansına nəzər yetirək. Zubir premyer-liqada 32 matçda meydana çıxaraq 8 qol vurub, 7 məhsuldar ötürmə verib. Azərbaycan kubokunda 2 qarşılaşmada oynasa da, fərqlənə bilməyib. Avrokuboklarda isə 16 görüşdə 2 qol vurub, 1 məhsuldar ötürmə verib. Yəni ötən mövsüm 50 qarşılaşmada rəqibləri 10 dəfə məyus edərək 8 dəfə komanda yoldaşlarının fərqlənməsinə şərait yaradıb.
Bu mövsüm isə Çempionlar Liqasında 3 görüşdə 1 qol vurub, 2 məhsuldar ötürmə verib. Bununla da Zubir avrokuboklarda 11-ci dəfə fərqlənmiş oldu. İndi bu siyahıya Reynaldo Silva ilə birgə başçılıq edir. Fransalı “Rakuv”la qarşılaşmada 1 qol vursa, braziliyalını geridə qoyacaq Ağdam təmsilçisinin avrokuboklarda ən çox fərqlənən oyunçusu olacaq.
Gördüyünüz statistika Zubirin səviyyəsindən xəbər verir. Oyunçunun faydalı iş əmsalı yüksəkdi. Lakin ona Azərbaycan millisinin formasını geymək olmaz. Guya yaşı çox imiş. Halbuki 1991 doğumludu. Ağdam təmsilçisi ilə gələn ilə qədər də müqaviləsi var. Bu performansla davam etsə, hələ 2-3 il də oynayacaq. Bu müddət ərzində millimizə xeyir verə bilməz? Necə olur ki, Höccət Haqverdi, Əli Qurbani, Filip Ozobiç kimi oyunçular 28-30 yaşında “milliləşdirilir”, amma Zubir yox? Axı fransalının göstəriciləri və faydalı iş əmsalı daha yüksəkdi. Guya Canni de Byazi Zubirin yığmaya çağrılmasını istəməz? Əlbəttə, istəyər. Ya futbolçular – Emin Mahmudov, elə Filip Ozobiç, Elvin Cəfərquliyev, Bəhlul Mustafazadə, Bədavi Hüseynov və yığmanın digər üzvləri ikiəlli razı olar ki, Mərakeş əsilli futbolçu yığmamıza dəvət olunsun.

Deyə bilərsiz ki, Zubir özü istəmir millidə oynamaq. Buna inanmırıq. Çünki dəfələrlə deyib ki, Azərbaycan yığmasında sevə-sevə çıxış edərəm.

Mediada və ictimaiyyətdə belə fikir formalaşıb ki, AFFA-da bir sıra dəyişikliklər baş verir. Bunlara az da olsa, şahidlik edirik. Amma bu dəyişikliklər yığmaya fayda verə biləcək futbolçunun kənarda qalmasına şərait yaradırsa, kimə lazımdı? Biz də istəyirik ki, millimizdə əsl azərbaycanlılar oynasın. Amma bizim yığmada Zubir səviyyəsində oyunçu və ya oyunçular varmı? Bax, bu düşündürücü sualdı!

İLKİN SULTANLI