Abdulla Zubir 2018-ci ilin iyununda “Qarabağ”a transfer olunub və 5 ilə yaxındı ölkəmizdə çıxış edir.

Bu səbəbdən də onun “milliləşdirilməsi” gündəmdədi. Nəzərinizə çatdıraq ki, vinger də yığmamızda çıxış etməyə isti baxır. Hələ Avropa Liqasının qrup mərhələsinin“Frayburq” – “Qarabağ” (2:1) matçından sonra “Futbol+”ə müsahibəsində bununla bağlı fikir səsləndirmişdi.

- Mövsümün sonunda Azərbaycanda çıxış etməyinin 5 ili tamam olacaq. “Qarabağ”ın heyətində “milliləşdirilən” futbolçular var. Riçard Almeydanı, Filip Ozobiçi nümunə göstərmək olar. Bu haqda düşünməmisən? Nə vaxtsa Azərbaycan millisində oynamaq istəyərsən? Nəzərə alaq ki, futbol ictimaiyyətinin 80 faizi sənin yığmada çıxış etməyini istəyər.
- Həqiqətən nəsə deyə bilmərəm. Əlbəttə, Azərbaycan millisində çıxış etmək məni xoşbəxt edər. Bir çox oyunçunun arzusudu ki, yığmada oynasın. Sənin də söylədiyin kimi, 5 ilə yaxındı Azərbaycanda çıxış edirəm. Bu ölkəni yaxşı tanıyıram. Yığma haqda hər şeyi bilirəm. Baş məşqçinizi tanıyıram. Düşünürəm ki, bəzi şeylər mənim üçün çox yaxşı ola bilər. Amma indiki məqamda bu haqda nəsə deyə bilmərəm. Çünki “milliləşdirilmə” ilə bağlı təklif olmayıb.

Zubirin 5 ilinin tamam olmasına cəmi iki ay qalıb. Elə iyunda Azərbaycan yığmasının Estoniya ilə matçı var. Görəsən, AFFA fransalının “milliləşdirilməsi” üçün hansısa addım atıb? Qurumun Mətbuat və İctimaiyyətlə Əlaqələr Departamentinin rəhbəri Firuz Abdulla sualımızı belə cavabladı: “Abdulla Zubirin “milliləşdirilməsi” ilə bağlı hansısa yeni xəbər yoxdu”.

Belə başa düşdük ki, qurum hələlik bu məsələdə tələsmək istəmir. Yəqin həm yığmanın baş məşqçisi, həm də futbolçu ilə bu istiqamətdə söhbətlər və müzakirələr davam edir. Ümid edək ki, sonu yaxşı olacaq. 5 mövsüm ərzində “Qarabağ”da 200 oyun keçirən, 43 qol vurub, 54 məhsuldar ötürmə verən vingerin yığmamıza fayda verəcəyini düşünənlər çoxdu. Ümid edək ki, AFFA rəhbərliyi də bunu nəzərə alacaq.

İLKİN SULTANLI