"Millimizin Estoniya ilə oyunundan sonra bir az ruh dükünlüyü yarandı. Eləcə də azarkeşlərin narazılığı oldu. Hamı düşünürdü ki, estonlar “dişimizə görə” rəqibdi və onları rahatlıqla udmalıyıq. Amma reallıq belədi ki, hazırda zəif rəqib yoxdu. FİFA reytinqində aşağılarda itib-batan bütün komandalar üst sıralarda olan yığmaları büdrətir. Biz də mübariz oyunla bunu edə bilərik. Baxmayaraq ki, Belçika millisi həddən artıq güclüdü. Amma ruh düşkünlüyünə imkan verməməliyik. "Dalğa Arena"da hakimin start fitindən ümidlə, döyüşkən oynamalıyıq. Özümüzü itirsək, nəticəsi ağır olacaq. Ən azı millimizin ifasında gözəl oyuna şahidlik etməliyik. De Byazinin “futbolçu seçimində kasadlıq var, seçim imkanımız geniş deyil” söyləməsinə gəlincə, reallıqları deyir. Razılaşsaq da, razılaşmasaq da, bu gün milliyə namizədlərin sayı azdı. Bizim yığmaya 100 futbolçu namizədimiz yoxdu ki, onlar arasından seçim edək. Düzdü, italiyalının iki-üç futbolçuya dəvət göndərməməsi müzakirə oluna bilər. Amma həmin oyunçular yığmanın sırasına qoşulsaydılar belə, nəticəyə aşağı-yuxarı təsir edəcəyini düşünmürəm. Ən azı rahatlıqla deyə bilmərik ki, o futbolçular De Byazinin sərəncamında olsaydı, Belçikanı məğlub edəcəkdik. Ona görə də reallıqla barışmalıyıq. Sadəcə, yığmamıza Belçika ilə matçda uğurlar arzulayıram". 

"De Byazi komandanı götürəndə cox nikbin danışırdı. İndi “oyunçu yoxdu” deyir. Bilirik ki, millimizin səviyyəsi bizə hansı nəticələr əldə etməyə ümid verir. Hər dəfə millinin toplanışında da fikir bildirir. De Byazi bu dəfə də bizə sürpriz etdi. Klubunda oynamayan oyunçunu milliyə dəvət edir. Belçika ilə oyuna gəlincə, fikrimcə, heç-heçə etsək, bizim üçün göydəndüşmə olar. Rəqibin heyətində çıxış edən ulduz futbolçular və FİFA reytinqində yeri bəllidi. Ona görə də yığma belçikalılarla oyunda maksimum mübarizlik və milli ruh nümayiş etdirməli, taktiki-texniki səhvlərə yol verməməlidi. Çünki Belçika kimi rəqib səhvləri bağışlamır". 

"Bu gün yığmamız dünyanın ən güclü millilərindən birinə qarşı oynayacaq. Belçika kimi reytinqli seçməyə qarşı oynamaq əlavə motivasiya, döyüşkənlik tələb edir. Yığmamızda istedadlı futbolçular var. İnanıram ki, onlar matça yaxşı motivasiya ilə çıxacaq, meydanda döyüşəcəklər. Ən azı trubunadakı azarkeşlər üçün maraqlı oyun göstərəcəklər. Təbii ki, yaxşı nəticəyə də ümidli olmalıyıq. Millimizə uğurlar arzulayıram".