"Yerli məşqçilərə qarşı sanki repressiya həyata keçirirlər”
"Neftçi"nin Müşahidə Şurasının iclasında Samir Abasovla yolların ayrılması və vakant posta əcnəbi məşqçi axtarılması haqda qərarın qəbulu son günlərin aktual mövzularındandı.
Klub rəhbərliyi hazırda Viktor Qonçarenko və Yuri Vernidub ilə danışıqlar aparır.
Məsələnin ciddiliyini nəzərə alaraq vaxtilə "Neftçi"nin formasını geyən veteran futbolçulara tribuna verdik. Onlardan biri də Yunis Hüseynovdu. O, həm Samir Abasovun göndərilməsinə, həm də komandanın əcnəbi mütəxəssisə tapşırılacağına münasibət bildirdi:
"Neftçi"nin Müşahidə Şurasında futboldan başı çıxmayan adamlar oturub. Ona görə də nə bəlli strategiya, nə uğurlu transfer siyasəti, nə də yerli mütəxəssislərə dəyər verən var. Azərbaycan futbolunda əcnəbilərin dominantlıq etməsinin həmişə əleyhinə olmuşam. İndiyə kimi ölkə futbolunda çalışan onlarla əcnəbi nə fayda verdi ki, Qonçarenko ilə Vernidubdan hansısa fayda gözləyək? Adı çəkilən əcnəbilərin, sadəcə, reklamı güclüdü. Onlara yaradılan şəraiti yerli mütəxəssislərə yaradın, o zaman görəcəksiz, onları necə kölgədə qoyuruq. Bu gün çoxları U-21 millimizin estoniyalı həmyaşıdlarını 5 qolla məğlub etməsindən bəh-bəhlə danışır. Adını da qoyurlar ki, "Milan Obradoviçin uğurudu". Gənclər arasında ən zəif, qrupda xala həsrət qalan, 32 top buraxıb, bir dənə də vura bilməyən yığma üzərində qələbə nə vaxtdan böyük uğur oldu? Millimizin son oyunda Finlandiyaya məğlubiyyətindən, qrupda keçirdiyi 9 oyuna 7 xal toplamasından, 11 qol vurub, 22 top buraxmasından heç danışan yoxdu. 10 il əvvəl yerli mütəxəssilərin rəhbərliyi altında da Estoniya, San Marino, Andorra kimi komandaları udurduq. Serbiyalının uğuru 10 il əvvələ qayıtmaqdı? Bu gün futboldan zərrə qədər də başı çıxmayan insanlar ölkə futboluna, yerli məşqçilərə qarşı sanki repressiya həyata keçirirlər. Düşünürəm ki, bu gedişlə Azərbaycanda futbol tam aradan qalxacaq".
ABDULLA İSMAYILOĞLU
Digər xəbərlər
