"Əsas problem odu ki, seçim imkanımız məhduddu” - De Byazi
“Belçikaya təslim olmaq fikrimiz yoxdur.
"Football-plus.az" xəbər verir ki, bunu “voetbalgokken.nl” saytına açıqlamasında millimizin baş məşqçisi Canni De Byazi AÇ-2024-ün seçmə mərhələsində Belçika yığmasına qarşı keçiriləcək oyunla bağlı danışarkən deyib.
İtaliyalı mütəxəssis rəqibin heyətində ulduz futbolçuların cəmləşdiyini söyləyib:
“Belçikalılarla oyun çox çətin olacaq. Rəqib böyük ulduzlara malik komandadır və FİFA reytinqində yuxarı pillələrdədi. Onların tanınmış klublarda çıxış edən futbolçuları var. Bizim oyunçuların çoxu isə daxili çempionatda mübarizə aparır. Ancaq yenə də öz oyunumuzu sərgiləyəcək və hədəflərimizə çatmaq üçün əlimizdən gələni edəcəyik”.
67 yaşlı məşqçinin fikrincə, əsas problem milliyə namizəd futbolçu sayının az olmasıdı:
“Düşünürəm ki, Almaniyada keçiriləcək Avropa çempionatına vəsiqə qazanmaq çox çətin olar. Azərbaycan millisinin səviyyəsi o qədər yüksək olmasa da, ildən-ilə daha da yaxşılaşır. Yaxşı oyunçularımız var. Əsas problem odu ki, seçim imkanımız məhduddu”.
Qeyd edək ki, Azərbaycan – Belçika oyunu sentyabrın 9-da “Dalğa Arena”da keçiriləcək.
Digər xəbərlər
