Bakıda keçirilən şahmat üzrə dünya kubokunda ölkəmizi həm kişilərdən, həm də qadınlardan ibarət kollektiv təmsil edirdi.

Bizim üçün bu yarışın o qədər də uğurlu keçdiyini deyə bilmərik. Yalnız Nicat Abbasov turnirin yarımfinalına qədər irəliləsə də, burda dünya şahmatının əfsanəsi Maqnus Karlsenə uduzmaqla finala çıxmaq şansı itirdi. Qadınların yarışında mübarizə aparanlardan biri də Gövhər Beydullayeva idi.

- Şahmata neçə yaşından maraq göstərməyə başlamısan?
- Atam 4 yaşımdan mənə şahmat oynamağı öyrədib. Bundan sonra mənim də bu sahəyə marağım yarandı. Daha sonra 6 yaşımda Həmkarlar İttifaqının Şahmat-dama klubunda şahmat dərsləri almağa başladım.

- İlk yarışını necə xatırlayırsan?
- İlk yarışım, səhv etmirəmsə, 6 yaşımda dərəcə turnirində iştirak etməyimdi. O vaxt uşaq olduğuma görə çox şeyi xatırlamıram.

- İndiyədək ən unudulmaz görüşün hansı olub?
- Unudulmaz oyunlarım bir neçə dəfə olub. Onlardan ən yaddaqalanı dünya çempionu olduğum yarışda erməni şahmatçıya qalib gəlməyim idi. Həmin qələbə ilə çempionluğa bir addım daha yaxınlaşdım. Bundan başqa, 2022-ci ildə kişilər arasında Avropa çempionatında iki qrossmeyster üzərində qələbə qazandığım oyunları da qeyd edərdim.

- Gəncən, lakin geriyə qayıtsaq, karyeranda hansı məqamı düzəldərdin?
- Karyeramda uğurlu görüşlərlə yanaşı, uğursuz yarışlar da olub. Lakin uğursuz oyunlardan nəticə çıxarmasaydım, indi uğurlar qazana bilməzdim. Fikrimcə, gələcəkdəki yarışlara köklənmək, yeni uğurlar qazanmağa çalışmaq lazımdı.

- Bakıda keçirilən dünya kuboku şahmatçılarımız üçün o qədər də uğurlu olmadı. Səncə, şahmatçılarımızın belə çıxışının səbəbi nədi?
- Dünya kuboku ən güclü və nüfuzlu yarışlardan biridi. Hər oyunçu rəqibi ilə klassik  matç oynayır. Bu görüşlərin sonunda qalib olan yarışlara davam edir. Burda şahmatın klassik növündən başqa, rapid və blits növlərində də hazırlıqlı olmaq tələb olunur. Turnirin nokaut sistemi ilə olduğunu nəzərə alsaq, ilk turdan finala kimi 1 ay davam edir. Yəni şahmat hazırlığından əlavə fiziki, psixoloji cəhətdən güclü olmaq çox önəmlidi. Bu yarışın başqalarından fərqi odu ki, daha ehtiyalı oynamaq tələb olunur. Əlbəttə, ən uğurlu çıxış edən Nicat Abbasov oldu. O yaxşı oyunlar keçirdi, mən yarışdan çıxandan sonra onun oyunlarını izləyirdim, qələbələrinə sevinirdim.

- Bu turnirdəki oyunlarını necə dəyərləndirərdin?
- Dünya kubokuna hərtərəfli yaxşı hazırlaşmışdım. İlk oyunda serbiyalı Marina Qayçinə 2:0 hesabıyla qalib gəldim. Növbəti oyunda isə gənclər arasında bir neçə dəfə dünya çempionu olmuş rusiyalı  Polina Şuvalovaya uduzdum. Polina ilə açılış oyununda düzgün oynamadığım üçün məğlub oldum. İlk görüşdə uduzandan sonra ikincini psixoloji cəhətdən oynamaq çox çətin olur. Çünki rəqibə növbəti mərhələyə keçməyə heç-heçə də bəs edir. İkinci qarşılaşmada bir neçə yerdə üstünlük əldə etmək şansım olsa da, bunu qələbə ilə sonlandıra bilmədim. Ümumilikdə daha yaxşı oynaya bilərdim. Bu yarışda ilk dəfə çıxış edirdim və təcrübəsiz idim. Bir neçə mərhələ adlamağa gücüm var idi. Ümid edrəm ki, növbəti dünya kubokunda daha yaxşı nəticə göstərmək şansım olar.

- Dünya kubokunda bundan atrığını bacara bilərdik?
- Əlbəttə! Əslində daha əvvəl bacarmışıq. Teymur Rəcəbov 2019-cu ildə turnirin qalibi olub. Sözsüz, bu il də yaxşı çıxış edə bilərdik. Lakin artıq bu turniri geridə qoyub, növbəti yarışlara köklənməliyik.

- Sanki ölkə şahmatı da əvvəlki günlərindən uzaqlaşıb. Sən necə düşünürsən?
- Düşünmürəm ki, şahmatımız geriləyib. Federasiya prezidenti  Mahir Məmmədov şahmatçılara həmişə xüsusi diqqət göstərir. İstər yığma üzvü olsun, istərsə də yeniyetmə şahmatçılar - federasiya maliyyə dəstəyi verir. Demək olar ki, hər il şahmatçılarımız Avropa və dünya çempionatlarında uğurla çıxış edirlər. Buna misal kimi ötən il  20 yaşadək qızlar və oğlanlar arasında dünya çempionatlarında kişilərdə 2 qızıl, qadınlararası AÇ-də 1 gümüş, 1 bürünc, yeniyetmələrin Avropa çempionatında 2 bürünc, dünya çempionatında 1 gümüş  medalımız oldu. Yeniyetmə şahmatçılar əvvəlki illərə nisbətən daha az medallar qazanırlar, lakin buna inkişaf və güclənmə dövrü deyə bilərik. İnanıram ki, bu il yeniyetmələr arasında Avropa və dünya çempionatlarında yenidən hər yaş kateqoriyasında himnimiz səslənəcək. Kişi və qadın millilərimiz haqda onu deyə bilərəm ki, federasiya tərəfindən xüsusi yerli və əcnəbi məşqçilər ayrılıb. Hər iki yığma builki Avropa çempionatında qələbəyə real namizəddi. Əlimizdən gələni edəcəyik ki, bu il vətənə qitə çempionu titulu ilə qayıdaq.

CAVİD ƏLİYEV