Avqustun 31-də Avropa Liqasının (AL) seçmə mərhələsində həlledici oyunlar keçirildi. Turnirin pley-off mərhələsinə yekun vuruldu və qrup turnirində oynayacaq bütün komandalar müəyyənləşdi.

Bu mərhələ yeganə təmsilçimiz üçün uğurlu alındı. Çempionlar Liqasının (ÇL) 2-ci təsnifat mərhələsində Polşa çempionu “Rakuv”a uduzan (2:3, 1:1) “Qarabağ”ın rəqibi 3-cü təsnifat mərhələsində eyni aqibəti yaşamışdı. “Qalatasaray” səddini keçə bilməyən (0:3, 0:1) “Olimpiya”nı Sloveniyada 2:0 hesabıyla məğlub edən son çempionumuza qrupa adlamaq üçün Bakıdakı 1:1 hesablı heç-heçə kifayət etdi.
Bu mərhələdə sabiq SSRİ-yə daxil olan 3 ölkədən 3 komanda iştirak edirdi. Pley-offa “Şerif” də qənaətbəxş nəticə ilə başlaya bilmişdi. “Neftçi”nin sabiq baş məşqçisi Roberto Bordinin çalışdırdığı Moldova çempionu Farer adalarında 1:1 hesablı heç-heçəyə razılaşdığı “Klaksvik”ə evdə 2:1 hesabıyla üstün gəldi. “Zarya”nın sonuncu təsnifat mərhələsini keçmək şansı çətin görünürdü. Ukrayna çempionatının bürünc mükafatçısı “Slaviya”ya Çexiyada keçirilən ilk matçın son dəqiqələrində buraxdığı iki cavabsız qolla məğlub olmuşdu. Mladen Bartuloviçin komandası cavab görüşünün ilk hissəsində hər iki qolun əvəzini çıxmaqla azarkeşlərini ümidləndirsə də, son dəqiqələrdə bir top buraxaraq AL-in qrup mərhələsinə vəsiqə qazana bilmədi.

İlk oyunlardan sonra “Ayaks”, “Yunion”, Zaqreb “Dinamo”su, “Aberdin” və “Olimpiakos”un pley-offu adlamaq imkanını artmışdı. Bu komandalardan “Aberdin” və “Dinamo” şansdan yararlana bilmədi. Şotlandiya klubu İsveçdə 2:2 hesablı heç-heçəyə razılaşdığı “Həkken”ə öz meydanında uduzdu (1:3). Mahir Emrelinin formasını geydiyi “Dinamo” ÇL-də mübarizəni dayandırandan sonra daha bir uğursuzluğa düçar oldu. Evdə “Sparta”nı 3:1 hesabı ilə məğlub edən zaqreblilər Çexiyada darmadağın oldular – 1:4. Baş məşqçi Sergey Yakiroviç yığmamızın hücumçusuna 73-cü dəqiqədə oynamaq şansı verdi. Bunadək 3:1 hesabıyla öndə olan meydan sahibləri Mahir mübarizəyə qoşulandan sonra daha bir qol vuraraq qrupa vəsiqə qazandılar. “Dinamo” pley-offun digər uğursuzları kimi mübarizəni Konfrans Liqasınının qrup turnirində davam etdirəcək.

pley-off, cavab oyunları
QARABAĞ - Olimpiya (Sloveniya) 1:1 (ilk oyun - 2:0)
Bayramov, 24-p. – D.Pinto, 36.
Şerif (Moldova) - Klaksvik (Farer adaları) 2:1 (1:1)
Luvannor, 16-p. Zuhuri, 74 – Kassi, 34.
Zarya (Ukrayna) - Slaviya (Çexiya) 2:1 (0:2)
Alefirenko, 34. Antyux, 41 – Yuraşek, 83.
Sparta (Çexiya) - Dinamo (Xorvatiya) 4:1 (1:3)
Haraslin, 2. Serensen, 24. Panak, 67. Olatunji, 87 - Baturina, 71.
Aris (Cənubi Kipr) - Slovan (Slovakiya) 6:2 (1:2)
Qomis, 21; 45+7; 51. Söke, 24. Mayambela, 67. Braun, 72 - Strelets, 37. Barseqyan, 89.
Ayaks (Niderland) - Ludoqorets (Bolqarıstan) 0:1 (4:1)
Tissera, 62.
Çukariçki (Serbiya) - Olimpiakos (Yunanıstan) 0:3 (1:3)
Masuras, 34. Bil, 45+1. Retsos, 53.
Luqano (İsveçrə) - Yunion (Belçika) 0:1 (0:2)
Ekkert, 7.
Aberdin (Şotlandiya) - Həkken (İsveç) 1:3 (2:2)
Miovski, 55-p. - Sadik, 14; 41. Layuni, 81-p.
Zrinski (Bosniya və Hersoqovina) - LASK (Avstriya) 1:1 (1:2)
Bilbiya, 38 – Yoviçiç, 52.