“Səbail” yeni mövsümə ortabab başlayanlar sırasındadı. Bayıl təmsilçisi 4 turdan sonra turnir cədvəlinin 7-ci pilləsində qərarlaşıb.

Komanda indiyə qədər “Sumqayıt”a 1:4, “Zirə”yə 1:2 uduzubsa, “Neftçi”ylə heç-heçə edib (1:1). İlk qələbəsinə isə son oyunda “Turan Tovuz”u məğlub etməklə (3:1) imza atıb. “Dənizçilər” ötən mövsüm zəif oyun göstərdi, demək olar ki, son tura qədər komandanın taleyi tükdən asılı idi. Şahin Diniyevin komandası mövsümü aşkar autsayder kimi bitirdi. Yaşananların bir daha təkrarlanması həm klub, həm də azarkeşlər tərəfindən arzuolunan deyil. Bunun nəticəsidi ki, komanda yay fasiləsində 90 faiz yeniləndi. İndi “Səbail”i uzun və gərgin mövsüm gözləyir.

"Football-plus.az" olaraq baş məşqçi Şahin Diniyevlə söhbətdə hədəflərə, görüləcək işlərə və gözləntilərə aydınlıq gətirəcək məsələlərdən danışdıq.

- Premyer-liqada ilk 4 qarşılaşma geridə qaldı. Düzdü, nəticələr və futbolçuların performansı haqda dəqiq fikir söyləmək üçün yetərli müddət deyil. Amma durumla bağlı ümumi fikirləriniz maraqlıdı...
- Düz vurğuladın. Hələ ki futbolçularla bağlı yekun söz demək üçün çox tezdi. Bilindiyi kimi, heyət, demək olar ki, tam yenilənib. Bir çox oyunçunun uyğunlaşması və formasını tapması üçün daha bir neçə matç lazımdı. Onlara futbol fəlsəfəmizi anlatmağa, lomandam haqda danışmağa tələsmirəm. Yaxşı cəhətlər olduğu kimi, qane etməyən vəziyyətlər də var. Həm hücumda, həm də müdafiədə çatışmazlıqlar nəzərə çarpır. İnanıram ki, qarşıdakı həftələrdə istədiyim futbolu nümayiş etdirə biləcəyik.

- Azarkeşlər yenilənmiş heyətin sabit oyun tərzinə yiyələnməsi və uyğunlaşmanın tamamlanması üçün nə qədər gözləməlidi?
- Məncə, 6-cı turdan sonra ağı qaradan seçmək olacaq. Onu deyim ki, bəzi futbolçular artıq potensialıyla bağlı müsbət mesaj verir. Məsələn, ilk turda “Sumqayıt”la oyunda 4 qol buraxdıq. Sözün əsl mənasında qələbəni rəqibə hədiyyə etdik. Həmin qolların qarşısını almaq rahatlıqla mümkün idi. Yaxşı ki, zamanla ciddi səhvlərin əksəriyyətini aradan qaldırdıq. Düzdü, bəzi səhvlər futbolun bir hissəsidi. Amma bunların üzərində çalışmasaq, vacib xallar itirə bilərik.

- “Səbail” ötən mövsüm legionerlər üzündən əziyyət çəkdi. Əksəriyyətinin doğru seçim olmadığı bəlli idi ki, klub yay fasiləsində çoxunu yola saldı. İndi 8 yeni əcnəbiylə anlaşmısız. Son 4 oyun onlar haqda hansı fikri formalaşdırıb?
- Legioner mövzusunda çox rahatam. Mərhum futbolçu Şəhriyar Rəhimovla idman direktorumuz Zamiq Hüseynovun bu yöndə dəqiq addımlar atdığına əminəm. Şəhriyarın 300-dən çox oyunu əvvəldən axıra qədər izlədiyini, oyunçuları təhlil etdiyini Tovuzda demişdim. Sözün düzü, indi buna görə çox peşmanam. Kaş ki, ona o qədər əziyyət verməzdik. Mən baş məşqçi kimi, sadəcə, bəzi epizodlara baxıb fikir yürüdürdümsə, o qat-qat artıq çalışırdı. Bu mövsüm əcnəbi futbolçularla bağlı ciddi problem yaşayacağımızı zənn etmirəm. Matçlarda çıxış etdikcə formaya düşürlər. Səhvlər xeyli azalıb. Dediyim kimi, iki-üç tur sonra daha ciddi işlər görəcəklər.

- Son oyun mövsümün ilk qələbəsini qazanmaq baxımından əlamətdar oldu. Ümumiyyətlə, “Turan Tovuz”la oyun bir çox cəhətdən yadda qaldı. Oyundan əvvəl favoritin adını çəkmək çətin idi. Hər iki tərəfin qələbə üçün əsaslı səbəblərini sadalamaq olardı. Amma oyun “Səbail”in aşkar üstünlüyü ilə müşahiə olundu. Bəlkə oyunun Şəhriyar Rəhimova həsr edilməsi komandada xüsusi ab-hava yaratmışdı? Yoxsa “Turan Tovuz”la oyunu geridönüş nöqtəsi saymaq olar?
- Bütün amillər vacib rol oynadı. Futbolçularım tapşırıqlardan kənara çıxmadı. Əksinə, üzərinə öz fərdi ustalıqlarını əlavə edib yaxşı oyun göstərdilər. Ayxan Abbasov güclü komanda formalaşdırıb. Tovuzluları evdə məğlub etmək çətin məsələdi. Ordakı azarkeş dəstəyi yüksək səviyyədədi. Sevindirici haldı ki, ağır təzyiq fonunda sona qədər təmkinlə öz oyunumuzu göstərə bildik. Hətta daha çox qol vura bilərdik. Epizodlar buna imkan verirdi.

- Gələn həftə “Səbail”i “Qarabağ”la çətin sınaq gözləyir...
- Elədi ki, var. “Qarabağ”ın təkcə adı bəsdi ki, komandam motivasiyalı olsun. Güclü heyətə qarşı mübarizə aparacağıq. Məqsəd bütün oyunlarda olduğu kimi qələbə qazanmaqdı. “Köhlən atlar” hazırda iki cəbhədə ciddi sınaq qaşısındadı. Təkcə Azərbaycanda yox, Avropada ad-san qazanmış rəqibdi. Futbolumuzu müxtəlif ölkələrə tanıdan klubla görüşə, təbii ki, yaxşı hazırlaşmaq lazımdı. Qalan vaxtı yaxşı dəyərləndirməliyik.

- “Turan Tovuz”la oyunda mövsümün ən iddialı performansını göstərdiz. “Qarabağ”la matçda da həmin “dənizçilər”i izləyə bilərik?
- Məhz “Turan Tovuz”u təhlil edəndən sonra düşündük ki, bu tərzdə oynasaq, qələbə ehtimalı daha çoxdu. Hər komandanın öz oyunu var. Eyni tərzlə hamısını məğlub etmək həmişə alınmır. Ağdam təmsilçisinə qarşı necə mübarizə aparmaq lazımdısa, elə də oynayacağıq.

- Yay “transfer pəncərəsi”nin bağlanmasına az qaldı. Hansısa futbolçu transferi gözləyək?
- Yox. Komandanın komplektləşdirilməsi başa çatıb. Fövqəladə vəziyyət olmasa, yenilik gözlənilmir.

- Rəhbərlik tərəfindən qarşınıza konkret hədəf qoyulub?
- Deyilməyib ki, mütləq Konfrans Liqasına vəsiqə qazanılmalıdı. Amma hədəfsiz futbol oynamaq mümkün deyil. Komanda olaraq, əlimizdən gələni edəcəyik ki, yüksək yerlərdən birində qərarlaşaq. Bu ilk “dördlük” də ola bilər, daha aşağı da. Hər şeyi zaman göstərəcək. Əsas məqsədimiz yaxşı futbol oynayıb qazandığımız nəticələrlə azarkeşləri sevindirməkdi. İndiki məqsəd isə çatışmazlıqları tezliklə aradan qaldırıb ümumi vəziyyətdə sabitlik yaratmaqdı.

KƏNAN BAHADIR