Karlos Tevesin işsiz günləri sona çatıb. O, “İndependyente”yə təyinat alıb.

“Football-plus.az” xəbər verir ki, gənc mütəxəssisin bu klubla bağladığı müqavilənin detallarına aydınlıq gətirilmir. Rəsmi məlumatda yalnız Tevesin baş məşqçi vəzifəsinə təyin olunduğu bildirilib. “İndependyente” 39 yaşlı məşqçinin karyerasında ikinci komandadı. Teves məşqçiliyə rəsmən 2022-ci ildə başlayıb. Amma həmin il “Rosario Sentral” ilə əməkdaşlığı yalnız 4 ay çəkib. Qeyri-qənaətbəxş nəticələrə görə noyabrda istefaya göndərilib.
Teves futbolçu həyatını 2021-ci ildə “Boka Xuniors”da başa vurub. O, yetirməsi olduğu klubda 2001-04, 2015-16 və 2018-21-ci illərdə çıxış edib. Sabiq hücumçu karyerası ərzində “Korintians”, “Vest Hem”, “Mançester Yunayted”, “Mançester Siti”, “Yuventus” və “Şanxay Şenxua”nın da formasını daşıyıb. Onun 2004-15-ci illərdə çıxış etdiyi Argentina yığmasında 76 oyuna 13 qol vurduğunu da xatırladaq.