Teves əsas fanatını itirdiyi üçün “daha bəsdi” dedi
Karlos Teves karyerası ilə bağlı vacib qərar verib: Argentina millisinin sabiq hücumçusu futbolçu həyatını başa vurub.
38 yaşlı hücumçu bu barədə özü açıqlama verib. O, qərarına atası Sequndo Raymundonun ölümünün təsir etdiyini deyib:
“Karyeramı başa vurduğumu bəyan edirəm. Bunu təsdiq edirəm. ABŞ da daxil olmaqla bir çox ölkədən təklif almışdım. Amma futbola əlimdən gələni verdim, daha bəsdi. Ötən il oynamaq mənim üçün çox çətin idi. Əsas fanatımı itirdiyim üçün daha futbol oynamaq istəmirdim. Vəssalam, bu oyunla birdəfəlik qurtardım”.
Qeyd edək ki, sonuncu komandası “Boka Xuniors” olan Karlos Argentina klubunda (2001-04, 2015-16, 2018-21) üçüncü çıxışını ailəvi səbəblərdən 2021-ci ilin fevralında dayandırmışdı. Doğma klubuna sonuncu dəfə 2018-ci ilin yanvarında qayıdan “Karlitos” ləqəbli futbolçu “göy-sarılar”ın heyətində bütün turnirlərdə meydana çıxdığı 279 oyunda 94 qol vurub. Ölkə nəhəngi ilə 11 titul qazanıb. O, uğurlarla zəngin karyerası ərzində “Korintians” (2005-06), “Vest Hem” (2006-07), “Mançester Yunayted” (2007-09), “Mançester Siti” (2009-13), “Yuventus” (2013-15) və “Şanxay Şenxua”da (2016-18) da oynayıb. 5 dəfə “Boka Xuniors”la Argentina, bir dəfə “Korintians”la Braziliya, iki dəfə MY, bir dəfə MS ilə İngiltərə, iki dəfə “Yuventus”la İtaliya çempionatının, “Boka Xuniors”la Libertadores Kuboku, Sudamerikana Kuboku və Qitələrarası Kubokun, MY ilə Çempionlar Liqasının və Klublararası Dünya Çempionatının qalibi olub. Argentina yığması ilə 2004-cü ildə keçirilən Olimpiadanın qızıl medalını qazanıb. Ölkəsinin əsas komandasında 2004-15-ci illərdə 76 oyun keçirib, 13 qol vurub. Tevesin ardıcıl üç dəfə (2003-05) Cənubi Amerikada ilin ən yaxşı futbolçusu seçildiyini də qeyd edək.
Digər xəbərlər
