"Zirə" 4-cü turda "Sabah" üzərində qələbə qazanmaqla liderliyini bir qədər də möhkəmləndirdi. Qəsəbə təmsilçisi uğurlu seriya cızır.

"Football-plus.az" olaraq, komandanın təcrübəli qapıçısı Anar Nəzirovla "Sabah"la oyundan sonra söhbətləşdik.

- Anar, komandan ardıcıl 4-cü qələbəsini qazandı. Bu haqda nə deyərdin?
- Ötən mövsüm qarşımıza qoyulan hədəfə çata bilməmişdik. Ona görə də yeni mövsümə daha inamlı, əzmlə hazırlaşmışdıq. Buna rəğmən, belə uğurlu start gözləmirdik. Amma hər oyunda meydanda qoyduğumuz mübarizə, sərgilədiyimiz oyun, qələbələr bizə güclü motivasiya verir. Həmçinin heyətə qoşulan legionerlər də oyundan-oyuna daha yaxşı uyğunlaşırlar.

- 4 tur arxada qalsa da, hələlik şans qazana bilməmisən...
- Heyət sabit çıxış edir. Bu üzdən qalib heyəti dəyişmək məntiqli deyil. Bundan başqa, kimin qapıda şans qazanıb-qazanmayacağına baş məşqçi qərar verir. Odu ki, Rəşad müəllim nə vaxt mənə ehtiyac duysa, komandam üçün əlimdən gələnin yaxşısı edəcəm. Eləcə də kənardan "Zirə" üçün dəstəyimi əsirgəməyəcəm.

- Həmkarın Şahruddin Məhəmmədəliyev son vaxtlar çox tənqid olunur, səhvlərə görə artıq "Qarabağ"ın əsas heyətində də yerini itirib. Yığmanın qolkiperinin uğursuz çıxışı haqqında nə deyərdin?
- Şahruddini yaxından tanıyan biri kimi deyirəm və nöqtə qoyuram ki, o, bütün söz-söhbətə uğurlu oyunu ilə son qoyacaq

- Səncə, tənqidlər obyektiv deyil?
- Yerində tənqidlər həmişə lazımdı. Amma hazırda Şahruddinə yönələn təzyiqləri yersiz sayıram. Heç bir futbolçu stabil formada ola bilməz. O cümlədən də Şahruddin. Dünyanın ən güclü qolkiperləri də səhvlər edir. Heç kim səhvlərdən sığortalanmayıb. Şahruddin "Qarabağ"da və millimizdə "1 nömrə" olmağı üçün çox əziyyətlər çəkib. Ona görə bir daha vurğulayıram ki, dağıstanlı həmkarımın hələ gözəl oyunları irəlidədi.

- "Qarabağ" heyətinə təcrübəli Andrey Lunyovu qatdı. Bu qərar Şahruddini bir qədər də kənarda qoymayacaq?
- Qətiyyən! Şahruddin rəqabəti sevən biridi. Odu ki, rusiyalının gəlişi yalnız onun xeyrinədi. Andrey Lunyova gəlincə, yetərincə təcrübəli, güclü qapıçıdı. Rusiya kimi güclü çempionatda da özünü təsdiq edib. Lunyov tək "Qarabağ"a yox, çempionatımıza da rəng qatacaq. Düşünürəm ki, nə qədər premyer-liqamıza sanballı legiolerlər, o cümlədən qapıçılar gəlsə, bunun yerli futbolçularıın inkişafına da faydası var.

- Oyundan sonra çox coşqulu və şən idin. Hətta "Zirə"nin bayrağını da azarkeşlər önündə dalğalandırdın.
- Bildiyiniz kimi, çoxdan "Zirə"dəyəm. Klubumuzun, futbolçuların azarkeşlərlə möhkəm bağlılığı var. Bugünkü qələbəmizin sevincini fanatlarımızla qeyd etmək istədim. Ona görə də onların xahişini yerinə yetirərək klubun bayrağını dalğalandırdım.

ABDULLA İSMAYILOĞLU