"Gərgin mübarizə qabaqdadı" - Rəşad Sadıqov
Misli premyer-liqasının 4-cü turunda "Zirə" səfərdə "Səbail"i məğlub edib - 2:1.
"Football-plus.az" xəbər verir ki, oyundan sonra "qartallar"ın baş məşqçisi Rəşad Sadıqov media nümayəndələrinin önünə çıxıb. Sizi mütəxəssisin fikirləri ilə tanış edirik:
"Keyfiyyətli oyun getdi. İlk hissədəki oyunumuz daha yaxşı alınırdı. Hər şey bizim nəzarətimizdə idi. Hesabı açdıq. Lakin sonradan gözlənilməz bir qol buraxdıq. Buna səbəb rəqibin irəli getməsidi. Müdafiəsində boşluqlar yaranırdı. Həmin dəqiqələrdə nəticəni mütləq dəyişmək lazım idi.Tam əksi oldu və onların səhvlərindən istifadə edə bilmədiyimizə görə "Səbail" bizi cəzalandırdı. Ümumi götürsək, ilk yarı bizim üçün çox yaxşı keçdi. Lakin ikinci hissənin əvvəlində rəqib də yaxşı oynamağa başladı. 70-ci dəqiqədən sonra üstünlük yenə biz tərəfə keçdi. Hücumlar qururduq, ərazi bütövlüyü bizdəydi. Mövqe hücumu ilə fərqlənmək alınmadı, amma sürətli hücumla qol vurduq. Futbolçularım xarakter göstərdi, yaxşı mübarizə apardı. Rəqibə qol vurmaq imkanı vermədilər. Vacib üç xal qazandıq. Komandamı, azarkeşlərimizi və rəhbərliyimizi təbrik edirəm".
- Ötən mövsüm həm qələbə olurdu, həm də məğlubiyyət. Amma yeni mövsümə üç qələbə ilə başlamısız. Ötən mövsümlə müqayisədə nəyi dəyişmisiz?
- Hazırlıqda, oyun planında, seleksiyada, heyət olaraq müəyyən dəyişiklərə getdik. Bu dəyişikliklərə ehtiyacımızın olduğunu düşündük. Amma aldığımız üç qələbəni bununla bağlamaq düzgün deyil. Ötən mövsüm qələbə qazanmalı oyunlarımızı uduzduq. Uğurlu start vermişik. İstərdim ki, futbolçularım bu məsuliyyəti dərk etsinlər və buna uyğun davransınlar və növbəti matçlara hazırlaşsınlar.
- Üç oyun, üç qələbə. Bu nəticələr növbəti matçlarınız üçün motivasiya ola bilər?
- Bu il çempionatımız çox gərgin keçir. "Sumqayıt" və "Turan Tovuz"un yaxşı performansını görürük. "Neftçi", "Qarabağ" və "Sabah" xal itirsə də, mövsümün sonuna kimi öz formalarına qayıdacaqlarını fikirləşirəm. Ötən mövsüm üç oyundan bir qələbə qazanırdın, yaxşı hesab edilirdi, amma bu mövsüm üç oyunda da qələbə qazanmısan və baxırsan ki, rəqiblər yenə sənə yaxındı. Bu da onu göstərir ki, gərgin mübarizə qabaqdadı. Biz də kollektiv olaraq bunu hazırlıqlı olmalıyıq.
- Filipe Paxtmanın qol vurmasına ən çox sevinənlərdən biri siz idiz. Onu meydana buraxanda qol vuracağını düşünmüşdüz?
- Paxtmanı daha tez buraxmaq istəyirdim. Sadəcə, süni ot örüyünə görə gec buraxdım. Düşündüm ki, son 15-20 dəqiqədə onun xidmətindən yararlanaq. Lakin 60-cı dəqiqədən sonra da onu meydana sala bilərdik. Qələbəyə hardasa sevinirəmsə, bir o qədər də Paxtmanın qol vurmasına sevinirəm. Qol vurduqdan sonra mənə yaxınlaşaraq, "çox sağ ol" dedi. O hiss edir ki, komandamız, rəhbərliyimiz, məşqçilər heyəti ona gevənir. Bu gün onun qol vurması bizi sevindirdi. İstəyirəm ki, gələcəkdə də uğurlu çıxışı yaxşı olsun.
Digər xəbərlər
