Dünən BOS-da "Turan Tovuz" ilə "Araz Naxçıvan" arasında yoxlama oyunu görüşü gerçəkləşdi. İki elita təmsilçisinin qarşıdurmasında Tovuz təmsilçisi üstün oldu. "Boz qurd" rəqibini 5:1 hesabıyla darmadağın etdi.

"Turan Tovuz"un heyətində ilk yarıda qapıda təcrübəli Kamal Bayramov yer almışdı. “Football-plus.az” olaraq oyundan sonra kapitanla toplanış barədə söhbət etdik.

- Təlim-məşq prossesini necə qiymətləndirərdin?
- Toplanışa yeni başlayanda həmişə çətinlik olur. İki həftədi ağır məşqlərimiz keçir. Məşqçilərimiz bizi yükləməklə formamızı bərpa etməyə və komandanın hazırlıqlı olmasına çalışır. İlk mərhələni başa vurduq. Sabah Antalyada toplanışın 2-ci mərhələsi başlayır. Orda 3 yoxlama görüşü keçirəcəyik. İnşallah, hazırlığımız yaxşı keçəcək, zədəsiz toplanışı başa vurub, mövsümə uğurlu başlayacağıq.

- Qapı xəttində sənlə yanaşı, daha 3 qolkiper yer alır. Bu səni qorxutmur?
- Qətiyyən. Ötən mövsüm qapı xəttində problem oldu, çətinliklər yaşadıq. Ümumiyyətlə, tək “çərçivə”də yox, bütün mövqelərdə nə qədər çox futbolçu seçimi varsa, bir o qədər rəqabət, iddia var. Odu ki, mənlə yanaşı, daha 3 həmkarımın komandada olması gözəl haldı. Mənim oynayıb-oynamamağım o qədər də vacib deyil, əsas "Turan Tovuz"un uğurlar qazanmasıdı.

- Komandaya yeni qoşulan oyunçular haqda nə deyərdin?
- "Turan Tovuz" həmişə mehriban, qayğıkeş, bir-birinə hörmət bəsləyən kollektiv olub. Bizə yeni qoşulan futbolçulara da isti münasibət göstəririk. Qısa müddətdən sonra onlarla daha yaxşı anlaşacağıq. Odu ki, bizdə uyğunlaşma, qarşılıqlı anlayış baxımından problem olmayacaq.

- "Turan Tovuz" ötən mövsümlə müqayisədə yeni “futbol ili”ndə bir qədər də güclənib. Artıq sponsorunuz da var. Bunları nəzərə alsaq, komanda ilk "4-lüy"ə düşməyi qarşısına hədəf qoyub?
- Qarşımıza ilk "4-lüy"ə düşmək məqsədi qoyulmayıb. Amma ötən mövsümlə müqayisədə daha yaxşı çıxış etmək, maksimum yuxarı pillələrdə qərarlaşmaq istəyirik.

ABDULLA İSMAYILOĞLU