“Araz-Naxçıvan” – “Sumqayıt” matçının reportajının “Gözdən qaçmaz” hissəsində maraqlı bir məqamı diqqətinizə çatdırmışdıq.

Bir qrup naxçıvanlı azarkeşin Azərbaycan bayraqları ilə stadiona gəlməsi xoş mənzərə idi. Onlar klubun əsas dəstəkçiləri olan “Nəqşicahan” azad azarkeş qrupundan fərqli sektorda əyləşmişdilər. Bu dəstənin bütün üzvləri, demək olar ki, yaşlı insanlar idi.

Məsələ ilə bağlı "Football-plus.az"a maraqlı informasiya daxil olub. Sən demə, həmin şəxslər nə “Araz-Naxçıvan” azarkeşidi, nə də naxçıvanlılar. Onlar Abşeron rayonunun müxtəlif bələdiyyələrinin əməkdaşlarıdı. Həmin şəxslər məcburi şəkildə premyer-liqa təmsilçisinə dəstək olmaq üçün aparılırlar. “Azarkeşləri” görüşə dəstək halında gətirənlər onlardan “Araz-Naxçıvan” qışqırmağı tələb edib. Son oyun zamanı ağsaqqallardan biri bu məsələyə etiraz edib. Çünki həmin şəxs “Kəpəz” fanatı olub. O, nümayəndəyə “Araz-Naxçıvan”a dəstək olmayacağını bildirib.

Görünür, “qırmızı-ağlar”ın rəhbərliyi klub ətrafında suni maraq yaratmaq niyyətindədi. Belə olacağı təqdirdə komandanın Bakıda çıxış etməsinin müddətini artırmaq olar. Ola bilər ki, Muxtar Respublika klubunun başbilənləri “paytaxtda komandanı çox sevirlər, problemlər tam həll olunana kimi burda məskunlaşaq” fikrini formalaşdırmaq niyyətindədi. Nə bilmək olar, bir də gördün “Araz-Naxçıvan” adını dəyişib oldu “Araz-Bakı”! Bir göz qırpımında klubun loqosu, adının yazılışı, rəhbərliyi dəyişmədi ki?! Məsələ ilə bağlı qarşı tərəfin fikirlərinə yer verməyə hazırıq.

İLKİN SULTANLI