Sentyabrın 13-də 1-ci liqa strat götürəcək. Turnirdə iştirak edəcək 10 komandadan biri də “Şamaxı”dı.

Bölgə təmsilçisi ötən mövsüm tərk etdiyi premyer-liqaya vəsiqə qazanmaq uğrunda mübarizə aparacaq. Komanda indiyə qədər bir çox futbolçu ilə müqavilə bağlayıb, bir neçə yoldaşlıq oyunu da keçirib. Bəs “şirlər” özünü yeni “futbol ili”nə hazır sayırmı? Heyətin komplektləşdirilməsi prosesi başa çatıb?

“Şamaxı”nın baş məşqçisi Vüqar Əsgərovla bu və başqa suallar ətrafında söhbətləşdik. Çalışdırıcının “Football-plus.az”a müsahibəsini təqdim edirik.

- 1-ci liqanın başlamasına 20 gün qaldı. Komandada ümumi ab-hava necədi? Futbolçuların fiziki və psixoloji hazırlığı hansı səviyyədədi?
- Ab-hava yaxşıdı. Psixoloji cəhətdən özümüzü tam hazır hiss edirik. Fiziki baxımdan isə bəzi çatışmazlıqlar nəzərə çarpır. Təxminən üç həftə ərzində bunları aradan qaldıracağıq.

- Yay fasiləsində “Qarabağ”ın əvəzedicilərini iki dəfə 2:0, “İmişli”ni 3:2, “İrəvan”ı 3:0 hesabı ilə məğlub etdiz. İlk turdakı rəqib “Qaradağ Lökbatan”a isə 1:2 hesabıyla uduzmusuz. Oyunları necə dəyərləndirirsiz? Qələbələrə əsasən komandanın rəsmi matçlarda da uğurlu çıxış edəcəyini demək olar?
- Çempionatdakı oyunlar daha ciddidi və fərqli ab-havada keçəcək. Məqsəd komandanı oyun tərzinə öyrəşdirmək və çatışmazlıqları təhlil etmək idi. Bunu da bacardıq. Rəsmi qarşılaşmalarda uğur qazanmaq üçün daha yaxşı çıxış etməyə məcbursan.

- Son həftələrdə heyətə yeni oyunçular qatılıb. Bundan sonra hansısa transferlər gözlənilir, yoxsa proses artıq yekunlaşıb?
- İndiyə qədər ölkənin bir çox perspektiv vəd edən futbolçusu ilə anlaşmışıq. Yekun heyət iki-üç gün ərzində ictimaiyyətə açıqlanacaq.

- “Şamaxı” premyer-liqanı tərk edəndən sonra mediada klub büdcəsində çatışmazlıqların yayıldığı haqda xəbərlər tirajlandı. Bu, komandanı formalaşdırmaq prosesinə necə təsir etdi?
- Düzdü, maliyyə itkisi yaşadıq. Amma klub rəhbərliyi büdcəni premyer-liqada olduğu kimi saxladı. Arzuladığım futbolçular bizimlədi.

- “Sektor 56” fanklubunun komandanı dəstəkləməkdən imtina etdiyi məlumdu. Bu hərəkəti necə qiymətləndirirsiz?
- Futbolu azarkeşsiz təsəvvür etmək çətindi. Ümid edirəm ki, yaxşı oyun və qələbələr ilə tərəfdarları sevindirib yenidən dəstəklərini qazana biləcəyik.

KƏNAN BAHADIR