Bu futbolçu "Şamaxı"da ayda 1200 manat maaş alacaq
Ötən mövsüm uğursuz nəticələrlə premyer-liqanı tərk edən “Şamaxı”da vəziyyət qəlizləşir. 1-ci liqada iştirakı təsdiqlənən bölgə təmsilçisi “qan itirməyə” davam edir.
"Football-plus.az" xəbər verir ki, yerli futbolçulardan qurulan heyətdən ayrılıqlar baş verir. Amil Yunanov, Bahadur Həziyev, Nihad Quliyev, Kamran Quliyev, Rauf Hüseynli, Kamal Mirzəyev, Rəhman Daşdəmirov, Tapdıq Əhmədov və Elvin Məmmədov kimi futbolçular 2023/24 “futbol ili”ndə “Şamaxı”da olmayacaq. Onların yerini doldurmaq üçün hazırlığa srağagün start verilib.
Digər tərəfdən, azarkeşlər sosial şəbəkələrdə növbəti mövsümdə nəinki premyer-liqaya qayıtmaq, 2-ci liqaya geriləməkdən qorxduqlarını yazıblar. Klubdan legionerlərin transferini tələb edən tərəfdarların sayı da az deyil.
Görəsən, yeni heyətin komplektləşdirilməsi istiqamətində hansı addımlar atılacaq? Klub azarkeşlərin narazılığını nəzərə alacaq? Bölgə təmsilçisi premyer-liqaya dönmək üçün nə edəcək?
"Football-plus.az" olaraq suallarımızı ünvanlamaq və son durumla bağlı ətraflı məlumat almaq məqsədilə “Şamaxı”nın baş məşqçisi Vüqar Əsgərli ilə əlaqə saxladıq:
“Növbəti mövsüm üçün bütün planlar hazırdı. Bizim öz strategiyamız var. O düzdü ki, bir çox futbolçu heyətdən ayrılıb. Amma yeni transferlərimiz olacaq. Danışıq apardığımız kifayət qədər oyunçu var. Müqaviləsi davam edənlər də komandadadı. Elçin Rəhimli və İbrahim Aslanlı ilə müddəti sona çatan müqavilələri yenilədik. İlk transferi də reallaşdırmışıq. Hücumçu Cəlal Cəbrayılov karyerasına “Şamaxı”da davam edəcək.
Yeri gəlmişkən, Bahadur Həziyevlə 3 illik müqavilə bağlamışıq. Hazırda 1 mövsümlük “Səbail”də icarədədi. Bundan sonra dayanmaq olmaz. Hədəfimiz, daha öncə də dediyim kimi, yenidən ölkə çempionatında iştirak etməkdi. Bunun üçün iddialı komanda yaradacağıq. Legioner transferi tələblərinə gəlincə, bu mümkün deyil. İndiki durum üçün çox çətin məsələdi. Ümid edirəm ki, planlarımıza uyğun davransaq, hədəfimizə çata biləcəyik”.
Yeri gəlmişkən, Bahadur Həziyevlə 3 illik müqavilə bağlamışıq. Hazırda 1 mövsümlük “Səbail”də icarədədi. Bundan sonra dayanmaq olmaz. Hədəfimiz, daha öncə də dediyim kimi, yenidən ölkə çempionatında iştirak etməkdi. Bunun üçün iddialı komanda yaradacağıq. Legioner transferi tələblərinə gəlincə, bu mümkün deyil. İndiki durum üçün çox çətin məsələdi. Ümid edirəm ki, planlarımıza uyğun davransaq, hədəfimizə çata biləcəyik”.
Beləliklə, Vüqar Əsgərli Cəlal Cəbrayılovun “Şamaxı”da çıxış edəcəyini dedi. Məlumat üçün bildirək ki, Cəlal müqavilə ilə “Sumqayıt”a məxsus olsa da, son mövsümü “Zaqatala”da keçirib. Hücumçu bölgə təmsilçisinin heyətində 15 qol vuraraq bombardirlər yarışında 3-cü yerdə qərarlaşıb.
Premyer-liqa uğrunda mübarizəyə ciddi hazırlaşan klubun iddialı futbolçulara müraciəti gözlənilən idi. Bəs forvard bu haqda nə düşünür? Yeni klubunu necə dəyərləndirir? Cəlal Cəbrayılovla əlaqə saxlayıb həm “Şamaxı”ya keçidi, həm də hədəfləri haqda fikirlərini öyrəndik:
“Zaqatala”da yaxşı mövsüm keçirdim. Düşünürəm ki, artıq daha böyük hədəflər üçün çalışmağın vaxtı çatıb. Ən böyük istəyim premyer-liqa klubunda oynamaqdı. Növbəti “futbol ili” üçün elitaya ən iddialı komanda “Şamaxı”dı. Bu səbəbdən klubla 2 illik müqavilə bağladım. Əlimdən gələni edəcəm ki, 1 il sonra “Şamaxı” premyer-liqadakı yerini təmin etsin”.
Əldə etdiyimiz məlumata görə, bölgə təmsilçisi Cəlala ayda 1200 manat maaş ödəyəcək.
KƏNAN BAHADIR
