Qadın voleybolçular arasında Avropa çempionatı davam edir. Əvvəlki üç oyunun birincisində Çexiyanı məğlub edən, ardından Almaniya ilə Türkiyəyə uduzan yığmamız srağagün Yunanıstanla oyunda qələbəyə hava-su kimi ehtiyac duyurdu. Düzdü, bizimkilər bu oyunda çətinliklə qalib gəldi, amma rəqib də iki set qazandığına görə hesabına 1 xal yazdı: Azərbaycan – Yunanıstan 3:2 (22:25, 25:19, 27:29, 25:18, 15:12). C qrupunda srağagün keçirilən digər oyunda meydan sahibi Almaniya gözlənilmədən Çexiyaya uduzdu – 2:3 (25:22, 25:23, 24:26, 20:25, 16:18).
Dünən günən ilk oyununda Yunanıstanı darmadağın edən (3:0 – 26:24, 25:16, 28:26) Türkiyə yığmamızın qrupdan çıxmaqla bağlı vəzifəsini xeyli asanlaşdırdı. Bakı vaxtı ilə saat 22.00-da Azərbaycan və İsveç yığmaları meydana çıxdı. Ataman Güneyligilin komandası bu oyunda acı məğlubiyyətlə üzləşməklə azarkeşlərini şoka saldı: Azərbaycan – İsveç 1:3 (17:25, 25:17, 21:25, 18:25). C qrupunda son oyunlar bu gün keçiriləcək: Çexiya – İsveç, Türkiyə - Almaniya. İsveçə uduzandan sonra 5-ci pilləyə geriləyən yığmamız indi yalnız Çexiyanın da bu komandaya “quru” hesabla uduzmasını arzulamalıdı ki, bu da qətiyyən inandırıcı görünmür. Bir sözlə, indidən “əlvida, Avropa çempionatı” demək olar.
1. Türkiyə 4 4 0 0 12-1 12
2. Almaniya 4 2 2 9-7 7
3. İsveç 4 2 2 7-8 5
4. Çexiya 4 2 2 7-8 5
5. AZƏRBAYCAN 5 2 3 8-11 5
6. Yunanıstan 5 1 4 5-13 4