İyunda karyerasında fasilə verdiyini və növbəti bir ildə heç bir komandanı çalışdırmayacağını bəyan edən Luçano Spalletti sözünün üstündə dura bilməyib.

"Football-plus.az" xəbər verir ki, İtaliya yığmasında baş məşqçi problemi məhz onun sayəsində yoluna qoyulub.Gözlənildiyi kimi, 64 yaşlı məşqçi milli komandaya təyinat alıb. İtaliya Futbol Federasiyası (İFF) ilə 3 illik müqavilə imzalayan Spalletti bu vəzifədə Roberto Mançinini əvəzləyib. Qeyd edək ki, o, daha əvvəl “Empoli”, “Sampdoriya”, “Venetsiya”, “Udineze”, “Ankona”, “Roma”, “Zenit” və “İnter” klublarında işləyib. Ötən mövsüm “Napoli”ni 33 illik fasilədən sonra İtaliya çempionluğuna daşıyan mütəxəssisin milli komandada ilə 3 milyon avro maaş alacağı xəbər verilir. Maraq üçün onun Neapol klubundakı məvacibinin 3,2 milyon avro olduğunu xatırladaq.

Spalletti yığmada fəaliyyətə sentyabrın 1-dən başlayacaq. Amma o, və İFF-ni qarşıda çətin proses gözləyə bilər. Məsələ ondadı ki, federasiya baş məşqçiyə görə “Napoli”nin tələb etdiyi təzminatı ödəməyib. Təzminatın məbləği isə 3 milyon avrodu. Klubun prezidenti Aurelio De Laurentis məşqçi ilə müqaviləni o, yaxın bir ildə hər hansı komandanın başına keçməyəcəyi şərti ilə pozmuşdu. Bu şərt pozulacağı halda Spalletti, ya da onun müqavilə bağlayacağı qurum “Napoli”nin xəzinəsinə müəyyən məbləğ köçürməli idi. Bu şərt yerinə yetirilmədiyi üçün De Laurentisin İFF-ni və Spallettini məhkəməyə vermək hüququ var. Yerli mənbələr çalışdırıcı ilə federasiyanın məhkəmədə mövqeyinii qorumağa hazır olduğunu qeyd edir. Deyilənə görə, İtaliya yığması “Napoli” ilə daxili yarışlarda rəqabət aparmadığı üçün təzminatla bağlı şərt bu məsələdə aktuallığını itirir.