Nəhayət, Serxio Riko uzun müddət müalicə olunduğu xəstəxananı tərk edib. PSJ-nin oyunçusu məlum qəzadan 82 gün sonra evə buraxılıb.

"Football-plus.az" xəbər verir ki, o, mayın 28-də İspaniyada at sürərkən başından ağır zədə almışdı. Serxio yerə yıxılandan sonra at onu təpikləmişdi. 29 yaşlı qapıçının beyninə qan sızmışdı.

Təxminən 3 həftə - 19 gün koma vəziyyətində qalan Riko iyulun 4-də reanimasiyadan adi palataya köçürülmüşdü.
İndi onun futbola qayıtmasının çətin olacağı iddia edilir . Serxio xəstəxanada keçirdiyi müddətdə 20 kiloqramdan çox çəki itirib və nitqində problemlər yaranıb. O, cümə günü Sevilyadakı “Virgen del Rokio” xəstəxanasından buraxılıb. Qapıçının həyat yoldaşı Alba Silva sosial şəbəkə hesabları vasitəsilə evə qayıtdıqlarını bildirib.

Riko sonuncu dəfə yaşıl meydana 2022-ci ilin mayında icarə əsasında “Malyorka”da oynadığı vaxt meydana çıxıb. Onun PSJ ilə müqaviləsinin müddəti 2024-cü ilin yayına qədərdi.