"Araz-Naxçıvan"ın futbolçusu: "Hədəfimiz avrokuboklara düşməkdi" - AÇIQLAMA
Dünən Misli premyer-liqasının 2-ci turunda "Araz-Naxçıvan" öz meydanında "Qəbələ"yə qalib gəlib - 2:0.
Qarşılaşmadan sonra Naxçıvan təmsilçisinin üzvü Turan Manafovdan görüş haqda fikirlərini öyrəndik. Sol cinah müdafiəçisi "football-plus.az"a açıqlamasında bunları söylədi:
"Bizim üçün çox yaxşı oyun keçdi. Baş məşqçimizin verdiyi tapşırıqları düzgün yerinə yetirdik. Rəqibin zəif nöqtələrini diqqətlə təhlil etmişdik. Yeni komandayıq. Çalışırıq ki, daha yaxşı olaq. Qələbəyə görə də uşaqları təbrik edirəm".
24 yaşlı futbolçu növbəti turda qarşılaşacaqları "Qarabağ"la oyun haqda danışdı:
"Qarabağ" yaxşı komandadı. "Qəbələ"yə qarşı sərgilədiyimiz performansı onlarla görüşdə də davam etdirmək istəyirik. Məşqçimizin verdiyi tapşırıqları dəqiq yerinə yetirə bilsək, "Qarabağ"la matçdan da xalla ayrılacağıq".
O, komandanın bu mövsümki hədəfləri barədə də danışdı:
"Hədəfimiz avrokuboklara düşməkdi. İnşallah, məqsədimizə çatarıq".
CAVİD ƏLİYEV
Digər xəbərlər
