Bu gün futzal üzrə UEFA Çempionlar Liqasında mübarizəyə başlayacaq “Araz-Naxçıvan”ın kapitanı Fərid Ələkbərov açıqlama verib.

"Footbal-plus.az" xəbər verir ki, Azərbaycan Futzal Federasiyasının mətbuat xidmətinə danışan Ələkbərov komandadakı son durumu dəyərləndirib:

“Hər şey qaydasındadı. 4 futzalçımız zədəli idi, onlardan 3-ü - Ramiz Çovdarov, Katatau və Sinese bizə kömək edə biləcək. Atmosfer də yaxşıdır. Baş məşqçinin dediyini düzgün yerinə yetirə bilsək, yekun da istədiyimiz kimi olacaq.

Baş məşqçi bizdən oyun intizamını qorumağı və məşq prosesində taktiki planda etdiklərimizin icrasını istəyir. Məşqdə dediklərinin 80 faizini oyunda yerinə yetirməyimizi istəyir. Biz hətta onun istədiklərinin 50 faizini belə icra edə bilsək, kifayət edəcək.

“Orebro”nun oyunlarını izləmişik. Uda biləcəyimiz komandadı. Təbii ki, bunun üçün “Araz-Naxçıvan” öz oyununu oynamalıdı. Arxayınlaşmaq olmaz.

Kapitan kimi ilk beynəlxalq rəsmi oyunumdu. Yaxşı kollektivimiz var. Son məşqimizi də keçdik. Artıq matçın başlamasını gözləyirik. Ancaq qələbə qazanmaq haqda düşünürük. İnşallah ki, bunu bacaracağıq”.

"Araz-Naxçıvan" bu gün İsveçin "Orebro" klubu ilə qarşılaşacaq.