"Kəpəz" Misli premyer-liqasının 2-ci turunda səfərdə "Zirə"yə 0:1 hesabı ilə məğlub olub.

"Football-plus.az" xəbər verir ki, matçdan sonra keçirilən mətbuat konfransında Gəncə təmsilçisinin baş məşqçisi Azər Məmmədov jurnalistlərlərin suallarını cavablandırıb:

- Üç transferin yolunu gözləyirsiz. Nə vaxt qoşulacaqlar komandaya?

- Transfer ağrılı yerimizdi. Komandada futbolçu kasadlığı görünür. Müasir futbolda maliyyə çox önəmlidi. Biz sırf dövlət tərəfindən ayrılan maliyyə ilə yaşayırıq. Gəncə kimi böyük şəhərin komandasının sponsoru yoxdu. Büdcəmiz imkan verdiyi qədər transfer edirik. Hər transferdə də diqqətli olmağa çalışırıq. Çünki yanlışlıq büdcəmizdə böyük itki deməkdi. Çalışırdıq ki, liqa başlayana qədər transfer edək. Amma alınmırdı. Bilirdik ki, kasadlıq olacaq. Bu gün də axtarışdayıq, bir neçə oyunçu ilə razılaşırıq. Bəzən Gəncəyə gəlmək istəmirlər, Bakını istəyirlər. Bəzən həyat yoldaşları, ailələri imkan vermir. Ən çox da artıq pul istəyirlər. Büdcəmizə uyğun transfer pəncərəsi bağlanana qədər 3-4 transfer edəcəyik.

- Junior Martins bu gün kölgədə qalmışdı. Onu da əvəzlədiz. Oynadığı övqeyin təsiri var?

- Onu iki matçdı ki, hücumçunun arxasında oynadırıq. Ötən mövsüm sol cinahda çıxış edirdi. Pleymeker çox incə yerdi. Ehtiramı da yoldaşlıq görüşündə orada yoxladıq. Ehtiram fərqlidi. "Neftçi" ilə görüşdə cinah müdafiəçisi kimi yerini tapdı. 8 və 10 nömrə tapmadığımıza görə, Junioru orada oynatdıq. Razıyam ki, tam istədiyimiz kimi deyil. Yenidi bu mövqedə. Ən yaxşısını etməyə çalışır. 10 nömrəli futbolçu tapsaq, Junioru yerinə çəkəcəyik.

- Bu gün üçün real olan mənzərəyə baxsaq, "Kəpəz" rəhbərliyi, FİF səviyyəsində danışıq aparırsız sponsorlarla?

- Rəhbərliyimiz, İlqar Nadiri ilə çox vaxt bir yerdəyik. O, "Kəpəz" üçün bacardığından artığını edir. Çox çalışır. Harada olsam da, "Kəpəz"i sevmişəm. Danışıqlar olur, əl atırıq hər yerə ki, sponsor olsun. Mətbuatda da bir neçə şirkətin adı çıxdı. Mənimlə bərabər rəhbərlik də sevinirdi ki, bəlkə həqiqətdi. Amma gördük ki, həqiqət deyil. Güman edirik ki, "Kəpəz" və Gəncə üçün sponsor çıxacaq. Axtarışdadırlar, çalışırlar kimisə cəlb etsinlər.

- Neçə transfer gözlənilir?

- Öz istəyim 6-7 transferdir. Amma maliyyə imkan vermir ki, bu qədər edək. Heç olmasa 3 transfer mütləq lazımdı. Elmir Tağıyev ötən mövsüm 4 oyunluq cəza alıb, onun geri dönüşünü gözləyirik. Vurğun Hüseynov da qayıdacaq. 3 transfer də gəlsə, rotasiyalar edəcəyik.